19 июн Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо муовини раиси Ҳукумати Федератсияи Россия Марат Ҳуснулин ва ҳайати ҳамроҳи ӯ, ки бо сафари корӣ ба Тоҷикистон ташриф овардааст, мулоқот кард.

Дар ин бора шуъбаи иттилоотии дастгоҳи Раиси шаҳри Душанбе иттилоъ додааст.

Ба таъкиди манбаъ, дар оғози суҳбат муҳтарам Рустами Эмомалӣ аз таъин гардидани Марат Ҳуснулин ба ҳайси ҳамраиси Комиссияи байниҳукуматии Тоҷикистон ва Россия оид ба ҳамкориҳои иқтисодӣ изҳори қаноатмандӣ намуда, аҳамияти муҳими комиссияи мазкурро дар танзиму пешбурди самараноки муносибатҳои дуҷонибаи байни кишварҳо таъкид карданд.

Гуфта мешавад, зимни мулоқот самтҳои асосии дурнамои муносибатҳои шарикии стратегии Тоҷикистон ва Россия, аз ҷумла робитаҳои байнипарламентӣ мавриди баррасӣ қарор дода шуданд. Зикр гардид, ки рушду тавсеаи мунтазами муносибатҳои гуногунҷанба бо Федератсияи Россия дар сиёсати хориҷии Тоҷикистон мавқеи хоса дорад.

Зимни мулоқот ҷонибҳо як қатор масъалаҳои мубрами рӯзномаи муносибатҳои дуҷонибаи Тоҷикистону Россия ва зарурати идомаи талошҳои ҷонибҳоро ҷиҳати тавсеаи ҳамкорӣ дар бахшҳои тиҷорату иқтисод, тақвияти робитаҳои байни минтақаҳо, ҷалби сармояи мустақим дар раванди саноатикунонии босуръати Тоҷикистон, густариши робитаҳои фарҳангиву гуманитарӣ ва муҳоҷират мавриди таваҷҷуҳ қарор доданд.

Бино ба иттилоъ, муҳтарам Рустами Эмомалӣ таваҷҷуҳи ҳамсуҳбати худро ба раванди рушду нумӯи шаҳри Душанбе ва дигаргуниҳои куллие, ки солҳои охир дар пойтахти кишвари азизамон ба вуқуъ пайвастанд, ҷалб сохта, фаъолгардонии ҳамкориро дар сатҳи пойтахтҳои ду кишвар аз самтҳои афзалиятнок маънидод намуданд.