Лоиҳаи нави Қонуни Ҷумҳурии Тоҷикистон "Дар бораи маҳдуд кардани истеъмоли маҳсулоти тамоку", ки аз ҷониби Вазорати тандурустӣ ва ҳифзи иҷтимоии аҳолӣ омода шуда, қарор аст, ба Маҷлиси намояндагон фиристода шавад, харидуфурӯши беназм, дастрасии содда ба тамоку, истифодаи он дар тарабхона, қаҳвахона ва дохили биноҳои дигарро қатъиян манъ мекунад.

Дар ин лоиҳа чун истисно дар бархе аз муассисаҳо, аз ҷумла шифохонаҳои бемориҳои руҳӣ ва зиндон иҷозаи истифода аз тамоку дар дохил дода шудааст. Ин нукта ҳам ҳоло мавриди баҳс аст.

Бар асоси омори расмӣ, феълан дар кишвар беш аз 500 ҳазор нафар тамоку мекашанд, ки 78 дарсади онҳо мардон, 10 фисад занон ва 12 дарсади дигарро ноболиғон ташкил медиҳанд.

- ​Маҳдудиятҳо зиёд шудааст дар ин қонун ва мо агар ба кишварҳои ҳамсоя назар кунем, мебинем, ки чунин маҳдудиятҳо ҳастанд. Худи маҳдудкунии истеъмоли тамоку мубориза бо бемориҳои ғайрисироятӣ, мисли бемории қалбу раг ва саратон аст, – гуфтааст Наврӯз Ҷаъфаров, муовини вазири тандурустӣ ва ҳифзи иҷтимоии аҳолӣ.

Тоҷикистон соли 2013 ба эъломияи умумиҷаҳонӣ оид ба мубориза бо тамоку ҳамроҳ шуд, аммо қонуни феълӣ барои мубориза бо тамоку заиф унвон мешавад. Ба гуфтаи мутахассисон, ҳоло истифодаи сигору нос миёни наврасон ва занон як навъ муд шудааст.

Ҷошуа Абрамс, роҳбари Барномаи мубориза бо тамоку дар кишварҳои Осиёи Марказии Ташкилоти ҷаҳонии тандурустӣ, ки барои расонидани таҷрибаи давлатҳои дигар ба Тоҷикистон омадааст, мегӯяд, бо 10 дарсад боло бурдани нархи тамоку, ҳаёти 10 миллион нафарро мешавад наҷот дод.