Дар солҳои 2022-2023 нархномаи хизматрасониҳои пулакии таълимии муассисаҳои давлатӣ ва ғайридавлатии таҳсилоти миёнаи умумӣ, миёна ва олии касбии Ҷумҳурии Тоҷикистон тағйир намеёбанд.

Дар ин бора раиси Хадамоти зиддиинҳисории назди Ҳукумати Ҷумҳурии Тоҷикистон Абдулмаҷид Муминзод зимни нишасти матбуотӣ иттилоъ дод.

Номбурда иброз дошт, ки аз натиҷаи таҳлили нархномаҳои муассисаҳои таҳсилоти миёнаи умумӣ, миёнаи касбӣ ва олии Ҷумҳурии Тоҷикистон дар соли 2021 ва бо мақсади дастгирии иҷтимоии донишҷӯён ва оилаҳои онҳо фармоиши Хадамоти зиддиинҳисорӣ аз 3 ноябри соли 2021 ба тасвиб расидааст.

“Тибқи он нархномаи хизматрасониҳои пулакии таълимии муассисаҳои давлатӣ ва ғайридавлатии таҳсилоти миёнаи умумӣ, миёна ва олии касбии Ҷумҳурии Тоҷикистон барои таҳсили солҳои 2022-2023 бе тағйир (ба истиснои ихтисосҳое, ки нав ҷорӣ карда мешаванд) мононда шаванд”,-иброз дошт сардаори хадамот.
Ҳамзамон дар нишаст гуфта шуд, ки соли 2021 аз ҷониби Хадамот 138 адад нархномаҳои хизматрасониҳои пулакии муассисаву ташкилоти давлатӣ ва ғайридавлатӣ, аз ҷумла 49 муассисаи тиббӣ ва 89 муассисаи таҳсилоти олӣ, миёнаи касбӣ ва муассисаҳои илмӣ таҳлил ва ба мувофиқа расонида шуданд.