ё ташаббуси навбатии Пешвои миллат аз ҷониби СММ чӣ гуна дастгирӣ ёфт?
14-уми декабр, Маҷмаи Умумии Созмони Милали Муттаҳид дар иҷлосияи 77-уми худ бо пешниҳоди Тоҷикистон бо ҷонибдории 153 кишвари узви ин созмон “Соли 2025 - соли байналмилалии ҳифзи пиряхҳо”-ро эълон кард. Иқдоми мазкур аз ҷониби Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2021 зимни нахустин ҷаласаи пешвоёни Эътилофи обу иқлим пешниҳод гардида буд.
14 декабри соли 2022 Маҷмаи Умумии Созмони Милали Муттаҳид зимни иҷлосияи 77-уми худ қатъномаи “2025 соли байналмилалии ҳифзи пиряхҳо”, ки аз ҷониби Ҷумҳурии Тоҷикистон пешбарӣ шуда буд, бо иттифоқи оро қабул кард. Он яке аз қатъномаҳои нодир ба ҳисоб меравад, зеро дар он ҳам эълони Рӯзи байналмилалӣ ва ҳам Соли байналмилалӣ дарҷ гардидааст.
ТАШАББУСҲО БАҲРИ ҲИФЗИ ПИРЯХҲО
Бо назардошти ин, Пешвои миллат муҳтарам Эмомалӣ Раҳмон пешниҳод намуданд, ки ҷиҳати тамаркуз кардан ба масъалаи мазкур дар сатҳи байналмилалӣ, соли 2025 ҳамчун Соли байналмилалии ҳифзи пиряхҳо ва Рӯзи байналмилалии ҳифзи пиряхҳо муайян гардида, бунёди махсуси байналмилалии ҳифзи пиряхҳо таъсис дода шавад.
Боиси ифтихор аст, ки дар асоси ин қатънома, пешниҳодҳои ироашудаи Президенти кишвар аз ҷониби кишварҳои узви СММ дастгирӣ ёфтанд. Аз ҷумла, 21 март ҳамчун Рӯзи байналмилалии ҳифзи пиряхҳо, соли 2025 ҳамчун “Соли байналмилалии ҳифзи пиряхҳо” эълон гардида, дар назди СММ таъсис додани Фонди боварии байналмилалӣ барои саҳмгузорӣ ба ҳифзи пиряхҳо ва дар соли 2025 доир намудани конфронси байналмилалӣ оид ба ҳифзи пиряхҳо дар Душанбе дастгирӣ гардиданд.
Гуфта мешавад, ки қатъномаи мазкур аҳамияти пиряхҳоро ҳамчун ҷузъи таркибии даври гидрологӣ ва таъсири ҷиддии обшавии босуръати онҳоро ба иқлим, муҳити зист, саломатии инсон ва рушди устувор қайд намудааст.
Ин ташаббуси Тоҷикистонро ЮНЕСКО низ дастгирӣ намуда, нақша дорад, дар таҳияи лоиҳаҳо бахшида ба рушди ин соҳа бо Ҳукумати кишвар ҳамкориҳоро ба роҳ монад. Директори генералии ЮНЕСКО Одри Азуле дар як нома ба Президенти Ҷумҳурии Тоҷикистон муҳтарам Эмомалӣ Раҳмон чунин гуфтааст:
“Мо итминони комил дорем, ки қатъномаи мазкур ҷиҳати баррасии аҳамияти пиряхҳо ҳамчун ҷузъи даври гидрологӣ ва таъкиди бештари мушкилиҳои ногузир дар соҳаи муҳити зист, тандурустии инсонҳо ва амнияти захираҳои об, ки аз обшавии босуръат ва коҳиши пиряхҳо зуҳур мекунанд, мусоидат хоҳад кард”,- зикр намудааст Азуле.
Ба гуфтаи ӯ, “дар доираи Барномаи байниҳукуматии гидрологии худ мо аллакай якчанд лоиҳаҳоро оид ба арзёбии таъсири барф ва пиряхҳо дар Осиёи Марказӣ оғоз кардем. Мо умедворем, ки бо шумо барои боз ҳам таҳким бахшидан ба ин ташаббусҳои муҳим ҳамкорӣ намоем”.
Теъдоди зиёди ҳаммуалли- фони қатъномаи мазкур бори дигар аз он шаҳодат медиҳад, ки ҷомеаи ҷаҳонӣ ба ташаббусҳои Ҷумҳурии Тоҷикистон ва саҳми он барои ҳаллу фасли чолишҳои ҷаҳонӣ эътимод дорад.
Бояд гуфт, ки инчунин аз ҷониби Тоҷикистон як қатор ташаббусҳои дигаре, ба монанди эълон намудани соли 2003 ҳамчун “Соли оби тоза”, солҳои 2005-2015 ҳамчун “Даҳсолаи байналмилалии амалиёти “Об барои ҳаёт”, соли 2013 ҳамчун “Соли байналмилалии ҳамкорӣ дар соҳаи об” ва Даҳсолаи нави байналмилалии амал “Об барои рушди устувор” барои солҳои 2018-2028” пешниҳод гардид, ки онҳо низ аз ҷониби ҷомеаи ҷаҳонӣ пуштибонӣ ёфтанд.
ОБШАВИИ ПИРЯХҲО ЧӢ ПАЁМАДҲО ДОРАД?
Мутахассион бар онанд, ки об шудани пиряхҳои Тоҷикистон, таъсири манфӣ дошта, он ба сатҳи иқтисодиёт ва ба соҳаҳои гуногуни кишвар метавонад, зарба занад.
Дар ин маврид Президенти кишвар муҳтарам Эмомалӣ Раҳмон низ борҳо нигаронӣ намуда, соли 2021 зимни нахустин ҷаласаи пешвоёни Эътилофи обу иқлим қайд карда буданд, ки обшавии босуръати пиряхҳо дар баробари зиёдшавии истеъмоли об, метавонад ба оқибатҳои манфӣ оварда расонад.
“Тағйирёбии глобалии иқлим ба сифати яке аз мушкилоти муосир, пеш аз ҳама, ба ҳолати пиряхҳо, захираҳои барф ва об таъсири манфӣ мерасонад. Ҷомеаи ҷаҳонӣ хуб дарк мекунад, ки коҳиш ва харобшавии минбаъдаи манбаъҳои обҳои ошомиданӣ дар сайёра метавонад, аҳли башарро ба фалокатҳои зиёди ҷонӣ, иҷтимоӣ ва иқтисодӣ дучор намояд. Аз ин лиҳоз, ба ҷомеаи ҷаҳонӣ зарур меояд, ки барои ҳалли ин масоили глобалӣ ҳарчи зудтар чораҳои зарурии муштаракро таҳия ва татбиқ намояд”, - изҳор доштанд Президенти мамлакат муҳтарам Эмомалӣ Раҳмон.
Қаблан Президенти Тоҷикистон борҳо таъкид карда буданд, ки масъалаи ҳифзи пиряхҳо - манбаи оби ошомиданӣ бояд дар маркази таваҷҷуҳи ҷаҳониён қарор дошта бошад. Ба гуфтаи Сарвари давлат, Тоҷикистон бар асари гармшавии глобалӣ пиряхҳоро аз даст медиҳад ва то кунун аз 13 ҳазор пиряхи ин кишвар як ҳазори он комилан аз байн рафтаанд.
Масоҳати пиряхҳо 8 фоизи қаламрави Тоҷикистонро ташкил медиҳад. Дар баробари ин қариб 60 фоизи тамоми захираҳои обии Осиёи Марказӣ ба ҳиссаи ин пиряхҳо рост меояд.
Сарвари давлат муҳтарам Эмомалӣ Раҳмон оид ба вазъи имрӯзаи пиряхҳои Тоҷикистон андешаронӣ карда, таъкид дош- танд, ки вазъи ба ин монанд дар пиряхҳои Помир низ ба вуҷуд омада истодааст. Обшавии бузургтарин пиряхи воқеъ дар хушкӣ - пиряхи Федченко дар Тоҷикистон, ки зиёда аз 75 километр дарозӣ дорад, намунаи возеҳи ин гуфтаҳо мебошад. Пажӯҳишҳо нишон медиҳанд, ки фақат дар тӯли 70- 80 соли охир пиряхи Федченко зиёда аз як километр ақиб рафта, майдони он то 44 километри мураббаъ кам шудааст. Зиёда аз ин, ҳаҷми он 15 километри мукааб ихтисор гардида, суръати миёнаи ақибравии нӯги (забони) пирях дар як сол 16 метрро ташкил медиҳад.
Мутахассисони соҳа мегӯянд, ин омил ба паст шудани маҳсулоти маҳаллии кишоварзӣ, афзоиш ёфтани норасоии об ва баланд шудани сатҳи миёнаи баҳрӣ таъсири худро мерасонад, ки он нигаронкунанда аст.
ТАЪСИРИ ОН БА ИҚТИСОДИЁТИ КИШВАР
Коршиносон ин ташаббусҳои Президенти кишварро дар мавриди ҳифзи пиряхҳо саривақтӣ ва муҳим шуморида, таъкид менамоянд, ки ин ташаббусҳо ҷиҳати роҳандозии ҳамкории бештари ҷомеаи ҷаҳонӣ дар роҳи расидан ба рушди устувор дар соҳаи об заминаи мусоид фароҳам меоранд.
Ҳалим Карамхудоев, устоди Донишгоҳи давлатии Хоруғ мегӯяд, ки аз иқдомҳои Президенти Тоҷикистон дар ин самт истиқбол мекунад ва мегӯяд, ки ин ташаббус як таконе буд, ки СММ дар пайи он қатънома қабул намуд.
- Бо дарназардошти пешниҳодҳои Пешвои муаззами миллат муҳтарам Эмомалӣ Раҳмон дар лавҳаи сатҳи баланд вобаста ба масъалаҳои об ва иқлим моро зарур аст, ки ҳамчун мардуми кишвари ташаббускор тамоми чорабиниҳои банақшагирифтаро пайгирона, ба таври мақсаднок ва дар сатҳи баланд иҷро намоем, то ки онҳо баҳри рушди устувор самараи дилхоҳ диҳанд ва дар ҷомеаи муосир мақому манзалати сазовор пайдо намоянд.
Ӯ мегӯяд, пеш аз ҳама баҳри тоза нигоҳ доштани иқлим бояд сокинони кишвар низ таъсиргузор бошанд ва захираҳои обиро оқилона истифода баранд.
Бо назардошти он ки Ҷумҳурии Тоҷикистон манбаи бузурги захираҳои обист, дар даҳсолаҳои охир обшавии раванди пиряхҳо зиёд шуд, ҷиҳати омӯзиши амиқи ин масъалаи муҳим дар ҷумҳурӣ Маркази пиряхшиносӣ ташкил гардидааст.
Маркази мазкур тасмим гирифтааст, ки баробари пешбурди тадқиқот, назорати захираҳои обиро гузаронида, инчунин харитаи пиряхҳои Тоҷикистонро омода намояд. Дар факултаҳои ҷуғрофиёи донишкадаҳо таълими ихтисоси омӯзиши пиряхҳо ба роҳ монда шуда, мутахассисони соҳаи мазкур тайёр карда мешаванд, то ки онҳо дар давоми даҳсола пажӯҳишҳои тахассусиро ба анҷом расонанд.
Эзоҳи худро нависед