2 август дар Театри мусиқи мазҳакавии ба номи Ато Муҳаммадҷонови шаҳри Қӯрғонтеппа бахшида ба 10-солагии амали Қонуни Ҷумхурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон” бо зиёиён, имомхатибон, раисони маҳалла ва фаъолон вохӯрӣ доир гардид.

Дар вохӯри муовини раиси вилояти Хатлон Махфират Хидирзода, раиси Кумитаи оид ба корҳои дин, танзими анъана ва ҷашну маросимҳои миллии назди Ҳукумати кишвар Сулаймон Давлатзода, раиси Шӯрои уламои Маркази исломии Тоҷикистон Саидмукаррам Абдуқодирзода ва намояндагони Вазорат корҳои дохилии Ҷумҳурии Тоҷикистон иштирок намуданд.

Сулаймон Давлатзода дар баромадаш иброз намуд, ки бо қабули қонуни мазкур ҳодисаҳои бетартибӣ дар тӯйҳо, вайрон гардидани қоидаҳои ҳаракат дар роҳҳо ва садамаҳои нақлиётӣ ҳангоми ҳаракати мошинҳои арӯсу домод асосан аз байн рафтанд. Ин дар навбати худ нигаронии ҷомеа, пеш аз ҳама, ташвиши падару модаронро хеле кам намуд.

Махфират Хидирзода гуфт, ки “Санади мазкур дар як муддати кӯтоҳи таърихӣ зарурат ва аҳаммияти худро ба ҷомеаи Тоҷикистон собит сохт ва ба ҳимояи манфиатҳои иқтисодиву иҷтимоии мардум мусоидат намуд”.

Тавре дар вохӯрӣ таъкид гардид, таи 10 соли амалаш қонуни мазкур дари саодату рӯзгори хушро ба рӯи мардум боз намуда, дар ниҳоди хурду бузурги кишвар эҳсоси сарфаю сариштакориро ташаккул дод ва мардумро аз камбизоатӣ раҳоӣ бахшид.

Дар охир иштирокчиёни вохӯрӣ пешниҳодҳои худро ба масъулин иброз намуданд.

Умед МИРЗОЕВ, “ҶТ”