6 феврали соли равон ҳудуди 30 нафар намояндагони ВАО аз бинои тозабунёди Муассисаи давлатии “Телевизиони Душанбе” дидан намуда, аз фаъолияту имкониятҳои ин телевизиони навбунёд аз наздик ошно шуданд.

Ин боздид бо ташаббуси Иттифоқи журналистони Тоҷикистон роҳандозӣ гардида, ба гуфтаи масъулин ҳадафаш ошноии бештар бо имкониятҳои ин телевизион ва пешниҳоди фикрҳои тоза дар ин замина, тақвияти робитаҳои касбӣ, мубодилаи таҷриба ва боло бурдани сатҳи фаъолияти журналистон мебошад.

Нахуст, Зинатуллоҳ Исмоилзода, раиси Иттифоқи журналистони Тоҷикистон қайд намуд, ки ифтитоҳи бинои нави “Телевизиони Душанбе” гувоҳ аз таваҷҷуҳу дастгириҳои Ҳукумати кишвар нисбат ба ВАО буда, нишона аз рушд ва пешрафти соҳаи телевизион мебошад.

“Ин шабака на танҳо пойгоҳи муҳимми пахши барномаҳои иттилоотию фарҳангӣ, балки намунаи як телевизиони муосир дар замони соҳибистиқлолӣ ба ҳисоб меравад”-мегӯяд Зинатуллоҳ Исмоилзода.

Сипас, Маъруф Оқилзода, директори МД “ТВ Душанбе” меҳмононро ба бинои нави телевизиони мазкур хушомадед гуфта, онҳоро бо шароити нави корӣ, студияҳои муҷаҳҳаз ва иқтидори техникии шабака шинос намуд.

Маъруф Оқилзода зикр намуд, ки ин муассиса 24 декабри соли 2025 бо иштироки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ мавриди истифода қарор гирифта, дар заминаи дастгириҳои ҳамешагии роҳбарияти Олии давлат ҳоло доираи пахши телевизион васеъ гардид. Ба қавли Оқилзода ҳоло телевизиони “Душанбе”-ро дар зиёда аз 40 кишвари дунё бо сифати FULL HD тамошо карда метавонанд.

- Бинои муассиса дорои 80 ҳуҷраи кории барҳаво буда, барои кормандони эҷодӣ ва техникӣ шароити хуби корӣ фароҳам оварда шудааст. Инчунин, дар он чор студияи муҷаҳҳаз бо муҳимтарин лавозимоти соҳавӣ мавҷуд аст. Калонтарин студияҳои студияҳои телевизион студияҳои якум ва дуюм мебошанд, ки барои сабти барномаҳои консертӣ, ток-шоу ва барномаҳои калонҳаҷм пешбинӣ шудаанд.

Ба гуфтаи директор 4 студия бо муосиртарин технологияи соҳавӣ аз қабили дастгоҳу таҷҳизоти рақамии формати сабташон 4К таъмин буда, имконияти сабт ва тариқи зинда пахш намудани барномаҳои иттилоотӣ, сиёсиву таҳлилӣ, фарҳангиву фароғатӣ, ток-шоу ва дигар барномаҳо вуҷуд дорад.

Инчунин, гуфта шуд, ки студияи марказии пахши барномаҳо, толори маҷлисгоҳ бо 200 ҷойи нишаст, ҳуҷраҳои кории роҳбарият, дизайнерҳои графикӣ, барномасоз, китобхонаи электронӣ ва анъанавӣ, синфхона барои машғулиятҳои такмили ихтисос, ҳуҷраи истироҳат, ҳуҷраи коркарди маълумоти бойгонӣ дар маҷмуъ ҳамаи ҳуҷраҳои бинои нави муассиса дорои шароити хуби корианд.

Директори телевизион таъкид кард, ки дар китобхонаи электронии муассиса беш аз ҳафт ҳазор китобҳои гуногун бо забонҳои тоҷикӣ, англисӣ ва русӣ мавҷуд буда, дар назар аст, ки шумораи онҳо оянда зиёдтар карда шавад. Ҳамчунин, китобхонаи электронӣ бо интернет пайваст буда, ба дӯстдорони китоб имкон медиҳад, ки китобҳои дилхоҳашонро пайдо намоянд.

Роҳбари муассиса дар идома илова намуд, ки айни замон аз тариқи ин телевизион барномаҳои фарҳангӣ-фароғатие чун “Майдони дониш”, “Шоми Душанбе”, “Равзана аз шаҳр”, “Достони хунёгар”, “Ворисони Сино”, “Пизишки ман”, “Аз рӯзгори ситораҳо”, барномаҳои сиёсии “Иршод”, “Ҳадаф”, “Таҳлил”, “Набзи иқтисод”, “Занони муваффақ” ва барномаи иттилоотии “Вақт” бо се забон - тоҷикӣ, русӣ ва англисӣ пахш мегардад. Ҳамзамон, дар оянда телевизион имкон дорад, ки доираи самтҳои барномаҳои худро фарохтар созад ва барномаҳои наву ҷолиб ба бинандагон пешниҳод шавад.

Дар фарҷом, Маъруф Оқилзода аз дӯстдорони телевизион даъват ба амал овард, ки метавонанд лоиҳаҳои нави худро ба телевизиони мазкур пешниҳод намоянд ва дар сурати қабул гардидани лоиҳаҳо онҳо омодаанд, ки ҳамкориро бо ин нафарон ба роҳ монанд.

Гулафшон КАРИМОВА,“ҶТ”