Бо мақсади тарғиби сиёсати хирадмандонаи Пешвои миллат, дӯстиву ваҳдат, дастовардҳои даврони Истиқлолият, пойдории сулҳу суботи сартосарӣ, фаҳмонида додани қонунҳои амалкунандаи кишвар, пешгирии қонунвайронкунӣ миёни омма, бахусус дар байни ҷавонон, 26 июл гурӯҳи кории МИҲД-и шаҳри Қӯрғонтеппа бо сокинони маҳаллаи “Ғайрат” вохӯрӣ доир намуданд.

Сардори шуъбаи Вазорати корҳои дохилӣ дар шаҳр Набиҷон Исозода зимни баромадаш вобаста ба ҳамкории сокинон бо мақомоти давлатӣ изҳори норозигӣ карда афзуд, ки ҳамкории сокинон бо мақомоти давлатӣ дар шаҳр дар сатҳи паст қарор дорад: “Танҳо дар якҷоягӣ ва ҳамкорӣ метавон сулҳу амнияти давлату ҷомеаро таъмин намуд. Аз ин рӯ, ҳар як шаҳрванд масъулияти иҷтимоӣ дорад, ки бо мақомоти давлатӣ ҳамкорӣ намуда, дар пешрафти давлату миллат ҳиссагузор бошад. Бинобар ин, ҳамаи моро зарур аст, ки ҳамкориро дар ин самт ҷоннок намоем.”

Дар вохӯрӣ ҳамчунин прокурори шаҳри Қӯрғонтеппа Баҳриддин Сафарзода, сармутахассиси котиби комиссия оид ба ҳуқуқи кӯдак Дилшод Шодиев, раиси ҲХДТ дар шаҳр Тавакал Наҷидуллоев, сархатиби масҷиди марказӣ Усмонали Нуров, мудирони шуъбаю бахшҳои МИҲД-и шаҳр ва сокинони маҳаллаи мазкур иштирок ва суханронӣ намуданд.

Дар фарҷоми вохӯрӣ миёни сокинони маҳаллаи “Ғайрат” бо гурӯҳи кории МИҲД-и шаҳр пурсишу посухҳо доир гардида, сокинон ба саволу дархостҳои худ ҷавобҳои қонеъкунанда гирифтанд.

Ёдовар мешавем, ки чунин вохӯрию мулоқотҳо дар маҳаллаҳои “Дӯстии халқҳо” ва “Ҳоҷӣ Шариф” –и шаҳр низ баргузор гардиданд.

Умед МИРЗОЕВ, “ҶТ”