Соли 2018 аз давлатҳои ҷангзадаи Ироқу Сурия шаш нафар кӯдаки тоҷик баргардонида, ба наздиконашон супорида шудаанд. Дар ин бора Ҳабибуллозода Раҷабмоҳ, Ваколатдор оид ба ҳуқуқи кӯдак дар Ҷумҳурии Тоҷикистон зимни нишасти ниҳоди мазкур иттилоъ дод.

Ба гуфтаи мавсуф, он кӯдаконе, ки аз Ироқу Сурия ба ватан баргардонида мешавад, аз ҷониби Ваколатдор оид ба ҳуқуқи кӯдак ҳамаҷониба дастгирӣ меёбанд. “Ба ҳамин мақсад бо тамоми мақомотҳои дахлдор, комиссияи ҳифзи ҳуқуқи кӯдак, бобати барқарор намудани ҳуҷҷатҳо, бо таҳсил фаро гирифтани кӯдакони баргардонидашуда ва дигар хизматрасониҳои иҷтимоиву равонӣ ҳамкорӣ мекунем. Аз ҳоли кӯдакони баргашта огоҳем ва онҳо зери назорат қарор доранд”, - гуфт Ҳабибуллозода Раҷабмоҳ.

Ҳамчунин гуфта шуд, ки гарчанде барои баргардонидани кӯдакон мақомотҳои дахлдор тамоми кӯшишҳоро ба харҷ медиҳанд, аммо мушкилоти дигар низ метавонанд, сади роҳ гарданд. Яъне пеш аз оне, ки кӯдакон ба Тоҷикистон баргардонида шаванд, розигии волидони онҳо, ки тибқи ҳукми додгоҳ дар давлатҳои ҷангзада ба мӯҳлати муайян ё абадан зиндонӣ шудаанд, ба инобат гирифта мешавад. Бештари он кӯдаконе, ки дар ин давлатҳо таваллуд шудаанд, хоҳиши баргаштани онҳо ба Тоҷикистон ба назар гирифта мешавад. Тарбияи онҳо ба зимаи хешу таборе, ки дар Тоҷикистон доранд вогузор мегардад. Мо кӯшиш менамоем, то охирин кӯдаке, ки дар кишварҳои ҷангзада қарор доранд, ба ватан баргардонем.