Дар доираи Барномаи давлатии "Беҳтар намудани вазьи мелиоративии заминҳои обёришавандаи кишоварзии Ҷумҳурии Тоҷикистон барои солҳои 2019-2023" беҳтар кардани ҳолати мелиоративии 9695 га. заминҳои обӣ ба маблағи 10,17 млн. сомонӣ ба нақша гирифта шуда буд, ки аз ин ба маблағи 11, 0 млн. сомонӣ (109 фоизи нақша) корҳои мелиоративӣ ба анҷом расонида шуда, ҳолати ғайриқаноатбахши мелиоративии 10577 га. заминҳо беҳтар карда шуд.

Дар ин бора 31 январ Зафарбек Давлатзода, директори Агентии беҳдошти замин ва обёрии назди Ҳукумати Ҷумҳурии Тоҷикистон зимни нишасти матбуотӣ иттилоъ дод.

Номбурда ҳамчунин қайд намуд, ки давоми чор сол дар доираи барномаи мазкур дар ҳудуди ҷумҳурӣ дар майдони 39239 га, ё ки 81 фоизи нақша ба маблағи 35714 ҳазор сомонӣ, ё 70 фоизи нақша ҳолати ғайриқаноатбахши мелиоративии заминҳо беҳтар карда шудааст.

Гуфта шуд, ки айни ҳол дар ҷумҳурӣ 362 адад ассотсиатсияҳои истифодабарандагони об фаъолият менамоянд, ки ба 440 ҳазор га. ё ин ки тақрибан 57,5 фоизи заминҳои обёришавандаи ҷумҳурӣ хизмат мерасонанд.