Дар ҷамоату деҳотҳои ноҳияи Зафаробод аксияи “Мо зидди ҳама гуна зуҳуроти номатлуб ва савдои одамон” гузаронида шуд.

Дар рафти аксия зикр гардид, ки савдои одамон яке аз зуҳуроти хавфноки иҷтимоии трансмиллӣ буда, дар миқёси ҷаҳонӣ ҳамчун ҷинояти вазнин ва поймолкунандаи ҳуқуқу озодиҳои инсон ҳисобида мешавад. Дар ҷаҳони муосир савдои одамон яке аз ҷиноятҳои хеле вазнин ва мудҳиш эътироф гардидааст. Хатарнокии ин намуди ҷинояткорӣ дар он зоҳир мегардад, ки савдогарони одамон бо кирдорҳои ҷинояткоронаи худ шахсони тамоман бегуноҳро ба доми фиреб гирифтор намуда, ҳуқуқу озодиҳои қонунан ҳифзшавандаи онҳоро поймол менамоянд.

Дар идома таъкид гардид, ки баҳри пешгирии ин зуҳурот аз тарафи Ҳукумати Ҷумҳурии Тоҷикистон Қонуни Ҷумҳурии Тоҷикистон “Дар бораи муқовимат ба савдои одамон ва расонидани кӯмак ба қурбониёни савдои одамон” қабул гардидааст.