Ба муносибати “Соли ҷавонон” дар ноҳияи Ванҷ таҳти унвони “Парчамат парафшон бод, Тоҷикистон!” ҳамоиши ҷавонон ва мусобиқаи волейбол доир гардид, ки дар он зиёда аз 1250 нафар ширкат варзиданд.

Ба гуфтаи Масрур Ғайратов, мудири Бахши кор бо ҷавонон ва варзиши ноҳия, дар чорабиниҳо ҳамчунин Давлатбибӣ Раҷабова, раиси ноҳия, роҳбарони сохторҳои қудратӣ, 50 нафар варзишгарон ва ҷавонону наврасон иштирок намуданд.

Дар бозии волейбол 6 даста миёни ҳам рақобат карданд, ки дар натиҷа тими “Ҷамоати Язғулом” дастаи “Маҳмадулло Абдуллоев”-ро бо ҳисоби 2:1 (25:21, 15:25, 25:22) шикаст дода, ҷои аввалро ба даст овард.

Барои гирифтани ҷои сеюм дастаҳои “Ҷамоати Водхуд” ва “М. Абдуллоев” рақобат карданд, ки дар охир тими “Ҷамоати Водхуд” ҳам бар дастаи рақиб бо ҳисоби 2:1 (25:18, 20:25, 25:16) ғолиб омад.

Ғолибон аз ҷониби Бахш ва мақомоти иҷроияи маҳаллии ҳокимияти давлатии ноҳия бо ифтихорномаҳо қадрдонӣ шуданд.

Машҳур ИМОМНАЗАРОВ, “ҶТ”