Варзишгарони тоҷик имрӯз - 22 сентябр дар 5-ум Бозиҳои Осиё дар иншооти пӯшида ва ҳунарҳои размӣ, намуди гуштини камарбандӣ (тарзи алиш) 3 медали биринҷӣ ба даст оварданд. Шумораи медалҳои Тоҷикистон ба 26 расид – 4 нуқра ва 22 биринҷӣ.

Медалҳоро Фурқатҷон Қаландаров дар вазни -100 кг, Меҳрзод Суфиев (-60 кг) ва Хуршед Шарипов (-90 кг) сазовор шуданд. 4 варзишгари дигари тоҷик дар ин намуди варзиш ба финал баромаданд: Маҳмад Миров (+100 кг), Раҷабзода Ғиёсиддин (-80 кг), Гулмаҳмадзода Беҳрӯз (-70 кг) ва Алибердизода Ибодулло (-60 кг). Рақобатҳои даври финалӣ соати 18:00 оғоз мегарданд.

Дар намуди кураш Фирдавс Насимов дар вазни (-100 кг) баъд аз як ғалаба бар варзишгари Лубнон Рабиҳ Бадер, ба даври нимфинал баромад. Рақиби Фирдавс дар нимфинал Илҳом Ҷӯраев аз Узбекистон аст.

Дар рӯзи дуюми мусобиқоти шоҳмот намояндагони Тоҷикистон Муҳаммад Ҳусейнхоҷаев бар Танадон Кулпретанон (Тайланд) ва Надежда Антонова бар Вадима Алкалбанӣ (АМА) ғалаба карданд. Алишер Каримов бо Егенио Торре (Филиппин) ва Мутриба Ҳотамӣ бо Сароша Чуемсакул (Тайланд) бозиро мусовӣ карданд.

Имрӯз мусобиқоти шиноварӣ оғоз гардид, варзишгарони мо Аниса Ҷӯраева, Анастасия Тюрина, Фарҳод Орипов, Олим Қурбонов, Климик Карина, Рамзиёр Хоркашев дар масофаҳои 50 ва 100 метр ба таври озод иштирок намуданд.

Шоми имрӯз, дастаи баскетболи Тоҷикистон (3х3) дар гурӯҳи “В” бо тими Лубнон вомехурад. Дар ин мусобиқа миёни мардон 16 даста дар 4 гурӯҳ рақобат доранд. Тоҷикистон ду бозиро бар дастаҳои Ироқ ва Туркманистон бохт. Воқеан дастаи баскетболи Тоҷикистон баъд аз 14 сол дар мусобиқоти сатҳи байналмилалӣ иштирок кард.