Аз 10 то 17 октябр дар шаҳри Фуҷайраи Амороти Муттаҳидаи Араб Чемпионати Осиё оид ба бокс миёни наврасон баругзор гардид. Дар он 239 варзишгар аз 26 давлати қора дар 26 категорияи вазнӣ – 13 вазн миёни писарон, 13 вазн миёни духтарон – барои ба даст овардани ҷойҳои ифтихорӣ талош намуданд.

Аз ҷумҳурии мо 11 варзишгар – 10 писар, 1 духтар ба АМА сафарбар гардида, дар 11 вазн муҳориба карданд. Варзишгарони навраси тоҷик тавонистанд дар пайи муҳорибаҳо маҳорати хуби касбӣ нишон дода ба гирифтани як медали тилло ва як нуқра даст ёбанд.

Медали тиллоро Абдураҳим Ёқубов дар вазни 54кг ба даст овард. Абдураҳим дар ду даври муқаддамотӣ бар варзишгарони Кувайт ва Бутан, дар нимфинал бар намояндаи Эрон ва дар финал бар варзишгари Қазоқистон ғалаба карда, унвони чемпиони Осиё миёни наврасонро мушарраф шуд.

Медали нуқраро Абубакр Муродов дар вазни 52кг сазовор гардид. Ӯ дар се даври муқаддамотӣ бар варзишгарони Қирғизистон, Кореяи Ҷанубӣ, Афғонистон, дар нимфинал бар намояндаи Ҳиндустон дастболо гардид, вале дар финал аз варзишгари Қазоқистон мағлуб гашт.