Аз соли 2007 то инҷониб ҳар сол якшанбеи сеюми моҳи май дар саросари Ҷумҳурии Тоҷикистон барои рушду инкишофи соҳаи варзиш ва оммавияти он бо мақсади таҳкими тарзи ҳаёти солим Рӯзи дави миллӣ баргузор мегардад. Ин навбат ҷавонону наврасони синну соли гуногуни шаҳри Қӯрғонтеппа ва ноҳияҳои атроф ба майдони Исмоили Сомонии вилоят омада, дар Дави миллӣ ширкат варзиданд.

Бино ба иттилои Алишер Гулов, мудири бахши варзиши Раёсати ҷавонон, варзиш ва сайёҳии вилояти Хатлон, сафи иштирокчиёни Дави миллӣ дар Қӯрғонтеппа 13 ҳазору 290 нафарро ташкил медод. Ва масофаи даве, ки иштирокдорон вобаста ба синну сол миёни ҳам сабқат намуданд, аз 3 то 5 километрро дарбар мегирифт.

Давлатшоҳ Гулмаҳмадзода, раиси вилояти Хатлон, зимни суханронӣ дар маросими ифтитоҳи Дави миллӣ гуфт: «Ҳамасола дар саросари кишвари азизамон гузаронидани Дави миллӣ ба ҳукми анъана даромадааст. Ногуфта намонад, ки ҳар сол роҳандозӣ шудани ин чорабинии оммавии варзишӣ барои сокинони вилоят имкон фароҳам меоварад, ки онҳо баҳри беҳбудӣ ва ташвиқу тарғиби тарзи ҳаёти солим дар мамлакат саҳмгузор бошанд».

Дар анҷом ғолибон бо ифтихорнома ва туҳфаҳо сарфароз гардонида шуданд.

Умед Мирзоев, “ҶТ”