Донишкадаи тарбияи ҷисмонии Тоҷикистон ба номи С. Раҳимов бо зиёда аз 40 муассисаҳои таҳсилоти олӣ, пажӯҳишгоҳҳои илмӣ - тадқиқотӣ ва таълимии кишварҳои хориҷӣ ҳамкорҳои судмандро ба роҳ мондааст. Дар ин замина танҳо дар нимсолаи таҳсили сипаришуда 5 шартномаи ҳамкорӣ бо муассисаҳои олии хориҷи кишвар ба имзо расонида шудаст.

Дар ин бора Шодӣ Сафаров, ректори донишкадаи мазкур зимни нишасти матбуотӣ иттилоъ дод.

“Нисбат ба солҳои пешин ҳамкориҳои донишкада бо ташкилотҳои гуманитарию донишгоҳҳои давлатҳои хориҷӣ вусъат ёфта, дар ҳамкорӣ чорабиниҳои гуногуни илмӣ, амалиро баргузор менамоем,”- гуфт Шодӣ Сафаров.

Номбурда қайд кард, ки бо баланд гардидани эътибори байналмилалии донишкада солҳои охир таваҷҷуҳи довталабон аз хориҷи кишвар зиёд гардида, айни замон зиёда аз 200 нафар шаҳрвандони кишварҳои хориҷӣ дар зинаи бакалавр таҳсил менамоянд ва бо мақсади бештар ҷалб намудани шаҳрвандони хориҷӣ дар донишкада гурӯҳҳои забони таҳсилашон русӣ ташкил карда шуда, мунтазам адабиёти таълимӣ ва сарчашмаҳои зарурӣ бо забонҳои хориҷӣ таъмин карда мешаванд.

Ҳошим РАҲМАТУЛЛОЕВ, “ҶТ”