2 июл дар меҳмонхонаи истироҳатӣ-табобатии “Сароб”-и Осоишгоҳи “Хоҷа Оби Гарм” Рӯзи байналмилалии хабарнигори варзишӣ бо иштироки зиёда аз 30 нафар хабарнигорони варзишии кишвар таҷлил гардид.

Ба муносибати ин ҷашн Кумити миллии олимпии Тоҷикистон дар якҷоягӣ бо Кумитаи кор бо ҷавонон ва варзиши назди Ҳукумати ҷумҳурӣ ҳамоиши идонаи хабарнигорони варзишии кишварро баргузор намуданд.

Дар он Маҳмадшоҳ Абдуллоев, котиби генералии КМОТ, Эркин Латифов, директори генералии КМОТ ва муовини Ассотсиатсияи намудҳои зимистонаи варзиши Тоҷикистон Зиннатуллоҳ Саидов иштирок намуданд.

Дар оғоз Маҳмадшоҳ Абдуллоев, котиби генералии КМОТ хабарнигоронро аз номи Аҳтам Абдуллозода, муовини Президенти КМОТ ва ҳамзамон раиси Кумитаи кор бо ҷавонон ва варзиш ба рӯзи идашон табрик намуд.

Сипас, Умаралӣ Сафаралӣ, сухангӯйи КМОТ оиди таърихи пайдоиши Рӯзи байналмилалии хабарнигори варзишӣ ба ҳозирин маърӯза намуд: “ Рӯзи байналмилалии хабарнигорони варзишӣ аз соли 1995 ҳамчун иди касбии хабарнигори варзишӣ таҷлил карда мешавад. Ассотсиатсияи байналмилалии матбуоти варзишӣ (International Sports Press Association, AIPS), 2 июли соли 1924 таъсис ёфта, зиёда аз 160 кишвари ҷаҳон, аз он ҷумла Тоҷикистон, аъзои он мебошад. Тоҷикистонро АИПС дар мисоли Ассотсиатсияи журналистони риштаи варзиши Тоҷикистон (АЖРВТ), ки 25 январи соли 2001 дар шаҳри Душанбе дар конфронси муассисон таъсис ёфтааст, моҳи марти соли 2011 дар Конгресси 74-уми АИПС дар шаҳри Сеули Кореяи Ҷанубӣ ба узвияти худ пазируфтааст”.

Дар давоми ҳамоиши мазкур суҳбати озод миёни хабарнигорони собиқадори соҳаи варзиш бо хабарнигорони ҷавон сурат гирифт.
  
Шодихони Назар, “ҶТ”