ВАРЗИШ
Сешанбе 25 Сентябр 2018 12:22
846
Имрӯзҳо тамоми торномаҳои варзишии қораи Осиё дар бораи ҳунару маҳорати паҳлавони тоҷик Комроншоҳи Устопириён ҳарф мезананд. Ин паҳлавони тоҷик тавонист баъди соҳиби гранприи ҷудо, ки соли 2015 дар Қазоқистон ба даст овард, парчами кишварро дар мусобиқоти Осиё дар зинаи аввал парафшон намояд. Дар ин мусобиқа, ки 15-16 апрел дар Тошканд - пойтахти Ҷумҳурии Узбекистон баргузор гардид, паҳлавони номдори кишвар Комроншоҳи Устопириён дар вазни -90 кило соҳиби медали тилло шуд. Ӯ дар даври аввал бар Иёл Салмон Ҳамад аз Урдун ва дар даври дуюм бар Автар Сингҳ аз Ҳиндустон ғолиб омад. Комроншоҳ дар даври нимниҳоӣ бар Шералӣ Ҷӯраеви узбекистонӣ дастболо шуда, дар финал бар намояндаи Ҷопон - Юсуке Кобаяши пирӯз гашт.

Комроншоҳи Устопириён нахустин варзишгари тоҷик аст, ки дар таърихи ҷудои тоҷик ба унвони қаҳрамони Осиё даст ёфт. Ӯ бо ин дастоварди худ соҳиби роҳхати Бозиҳои тобистонаи олимпии Рио-де-Жанейрои Бразил гардид. Акнун Комроншоҳ дар рейтинги ҷудои ҷаҳон дар зинаи ҳаштум қарор дорад. Ёдовар мешавем, ки Комроншоҳ дар баробари гӯштини ҷудо қаҳрамони чандинкаратаи Осиё аз намуди самбо ва кураш, инчунин чемпиони ҷаҳон миёни наврасон дар риштаи самбо мебошад. Бо Комроншоҳи Устопириён оид ба ин дастовард ва омодагиҳояш ба Бозиҳои олимпӣ суҳбат оростем.
- Комроншоҳ, Шуморо ба ин дастовард табрик мекунем, мегуфтед, ки то ин мусобиқа марҳилаҳои омодагиро чӣ гуна пушти сар кардед?
- Ташаккур, аввал миннатдориамро ба тамоми мардуми тоҷик мерасонам, ки меҳнати маро қадр карданд ва ҳангоми баргаштан аз Тошканд нағз пешвоз гирифтанд. Ин дастоварди ман не, балки дастоварди мардуми тоҷик аст. Соли 2016 барои варзишгарони ҷаҳон соли мушкил хоҳад буд. Зеро тамоми варзишгарон аз оғози сол барои дарёфти роҳхат ба Бозиҳои олимпӣ кӯшиш мекунанд. Мо тайёриҳои худро барои ба даст овардани роҳхат дар чанд давлат гузарондем. Моҳи январ барои машқҳои дастаҷамъӣ ба давлати Австрия рафтем, баъдан дар Олмон бо беҳтарин варзишгарони Аврупо машқҳои дастаҷамъӣ гузаронидем. Моҳи март дар шаҳри Хуҷанд бо падар ва бародарам Фаридун Устопиров, ки мураббиёни ман мебошанд, бо машқи сангбардорӣ машғул будам. Баъдан муддати 10 рӯз баъди мураббиам Николай Елчанинов аз Русия омадан ҳарифони худро омӯхтам. Наворҳои онҳоро пайдо карда, бо тарзи гӯштигирии онҳо ошно гаштам. Тайёрии ҳамаҷониба буд, ки дар чемпионати Осиё бар ҳамаи ҳарифонам дастболо гашта, унвони қаҳрамониро соҳиб шудам.
- Мусобиқа дар кадом сатҳ гузашт?
- Мусобиқа дар сатҳи бисёр баланд доир гардид. Беҳтарин варзишгарони қораи Осиё баҳри роҳхат гирифтан ба Олимпиада ташриф оварда буданд. Ин мусобиқа нисбат ба мусобиқаҳои пешин барои ман каме душвортар буд, зеро ҳама варзишгарони касбӣ ҷамъ омада буданд ва ҳамаи вохӯриҳо мушкил гузашт.
- Барои омода шудан ба олипиада тайёриро бо кадом мураббиён мегузаронед: дохилӣ ё хориҷӣ?
- Мо бо Николай Елчанинов, мураббие, ки беҳтарин варзишгари мо Расул Боқиевро барои Олимпиадаи Пекин-2008 омода намуда буд, шартнома бастем. Ӯ барои дар сатҳи баланд тайёр шуданам ба олимпиада маро тамрин медиҳад, тайёрии пеш аз олимпиадавиро ҳам бо ин мураббии рус мегузаронам.
- Соли 2013 дар мулоқоти Пешвои миллат бо варзишгарон, падаратон ваъдаи ҷоизадор шудани Шуморо дар олимпиадаи имсола дода буданд. Ин ваъда дар ҳаёти варзишии Шумо чӣ таъсир расонд?
- Ваъдаи падар дар назди Президент масъулияти зиёдро ба ман вогузошт. Барои ин армони падарро нашикастан аз ҳамон рӯз барои дарёфти роҳхат ба олимпиада кӯшиш кардам. Падарам ҳам ба хотири ваъдаи додаашон тамоми шароити варзиширо барои ман муҳайё намуданд. Ба чандин мусобиқаҳову машқҳои дастаҷамъӣ берун аз кишвар сафар намудем. Буданд ҳолатҳое, ки монда мешудам, мехостам тамринро аз ду баст ба як баст гузаронам, вале ваъдаи падар ба ман нерӯю илҳоми нав мебахшид ва барои нашикастани ин ваъда роҳ ҷониби тамрингоҳ мегирифтам. Кӯшиш мекунам, барои амалӣ гардидани ин ваъда ва боварии падар муборизаро идома диҳам.
- Дар қораи Осиё ҳарифи пурқувват барои шумо кадом варзишгар буд?
- Дар намуди гӯштини ҷудо варзишгарони Ҷопон боқувватанд. Ҳарифи пурқувват ва таҷрибадори ман Юсуке Кобаяши аз Ҷопон буд, ки дар даври ниҳоии чемпинати Осиё бо ӯ вохӯрдам ва ба ман муяссар гардид, ки пирӯз гардам.
- Дар радабандии ҷаҳонӣ аз ҳисоби холҳо дар зинаи 8 қарор доред, он варзишгароне, ки аз шумо холҳои зиёд ба даст овардаанд, аз ҳунари онҳо огоҳ ҳастед ва дар олимпиада ҳарифи асосӣ кадомашро меҳисобед?
- Дар радабандии ҷаҳонӣ дар вазни 90 кило 380 нафар варзишгар аст. Ман дар ин радабандӣ зинаи 9-умро гирифтам. Ман бо ҳамаи варзишгароне, ки дар радабандӣ дар мақоми аз якум то бистудуюм қарор доранд, қуваозмоӣ кардаам. Онҳо низ мисли мо иштибоҳ мекунанд, ғолиб меоянд, ҳар яки онҳо ҳам ба хотири ҷоизадор шудан ба олимпиада сафар мекунанд, онҳо низ то ин зина расидан мушкилиҳои зиёдро паси сар намудаанд. Бо ҳамаи онҳо имкони ғолиб омадан ҳаст, зеро сарчашмаи гӯштии ҷудо аз гӯштии миллии мо гирифта шудааст. Варзишгарони мо имкониятҳои зиёдтари ғолиб омадан доранд. Мо кӯшиш мекунем, ки ба онҳо ғолиб омада, бо сари баланд ба Ватан баргардему сазовори боварии мардуми тоҷик бошем.
- Омодагии пеш аз олимпиядавии худро дар куҷо мегузаронед?
- Аллакай, бо барномаи пеш аз олимпиадавӣ шинос шудам, бо мураббиён маслиҳат кардем, аз 1 май ба Русия барои тамрин сафар мекунем, баъдан машқҳои дастаҷамъӣ бо варзишгарони Аврупо дар Барселонаи Испания мегузаронем. 20 рӯз пеш аз олимпиада ба хотири мутобиқ шудан ба боду ҳавои макони баргузории олимпиада ба Аргентина сафар мекунем. Насиб бошад, 9-уми август вазн бар мекашем ва 10 август дар Бозиҳои олимпӣ баромад хоҳем кард.
- Боз кадом варзишгарони мо имкони бештари гирифтани роҳхат ба Бозиҳои олимпиро доранд?
- Дар баробари гӯштии ҷудо муштзанҳо ва гӯштигирони тарзи озоди мо имкони бештар барои роҳхат гирифтанро доранд ва умед мебандем, ки онҳо ҳам роҳхати бозиҳои олимпиро ба даст меоранд, ман ба ҳамаи онҳо барор мехоҳам. Аз рӯи намуди гӯштии ҷудо нисбат ба дигарон Саидҷалол Саидов ва Муҳаммадмурод Абдураҳмонов имкони бештар доранд. Аз ҳисоби холи бадастовардаи ман аз ин ду яке имкони маро дар олимпиада ҳамроҳӣ намудан доранд. Аз 6-ум то 10-уми май дар Боку мусобиқаи Grand Slam оид ба ҷудо ва 15-17 май дар Алмаато гранпирии ҷудо баргузор мегардад. Аз ин ду варзишгар дар ин мусобиқаҳо кадоме натиҷаи хубтар нишон диҳад, ба олимпиада сафарбар мешавад.
- Рио-де Жанейро охирин олимпиадаи Шумо мешавад ё муҳорибаро барои олимпиадаҳои баъдӣ идома медиҳед?
- Ҳоло ман бистусесолаам. Варзиш барои ман аз падар мерос мондааст, дар баробари ман набераҳои падарам Деваштич, Каюмарс, Саидиброз, Саидиқбол, Озарахш, Ардашер ба тамрин машғуланд ва давомдиҳандаи касби бобо мебошанд. Ин аввалин олимпиада мешавад, ки ман иштирок мекунам. Баъдан боз тамринро бо бародарон идома медиҳем, бо хости Худо нияти дар ду олимпиадаи дигар иштирок карданро ҳадаф қарор додаем.
- Дар охир чӣ таманиёт доред ба мардуми варзишдӯсти кишвар?
- Аввал ба Пешвои миллат, муҳтарам Эмомалӣ Раҳмон арзи сипос мекунам, ки як иқдоми некро барои варзишгарони кишвар роҳандозӣ намуда, Ҷоизаи Президентро таъсис доданд. Баъдан ба ҳамаи онҳое, ки то имрӯз маро сарпарастӣ намуда, барои расиданам ба ин мартаба мусоидат карданд, миннатдорӣ баён мекунам. Ба мардуми тоҷик ва дӯстдорони варзиш мегӯям, ки пешгӯӣ намекунам, вале танҳо ба хотири иштирок ба олимпиада сафар намекунам.
- Ташаккури зиёд барои суҳбати самимӣ, ҷоизадор шуданатонро дар олимпиада таманно мекунем.
- Саломат бошед.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30

Сентябр 2018 c.