Дастаи мунтахаби футзали Тоҷикистон дар даври чорякниҳоии Ҷоми Осиё-2024 дар Тайланд тими миллии Афғонистонро бо ҳисоби 2:1 мағлуб намуд.

Ин бозӣ имрӯз - 24-уми апрел дар маҷмааи варзишии Хуамарки шаҳри Бангкок соати 12:00 бо вақти Душанбе оғоз гардид.

Паси аз ин ғолибият дастаи мунтахаби футзали Тоҷикистон ба даври ниманиҳоии мусобиқа роҳ ёфта, соҳиби роҳхат ба Ҷоми ҷаҳонии футзал-2024 гардид.

Сармураббии тими миллии футзали Тоҷикистон Пайрав Воҳидов пеш аз бозии даври чорякниҳоии Ҷоми Осиё-2024 муқобили тими миллии Афғонистон дар рӯбарӯи хабарнигорон суҳбат кард.

“Мо дар як гурӯҳи қавӣ будем ва бозӣ бо қаҳрамони феълии Осиё - тими Ҷопон хеле душвор буд, аз ин рӯ, хеле шодем, ки ба даври чорякниҳоӣ баромадем. Аммо ҳоло мо бо тими миллии Афғонистон боз як рақобати душвор дорем. Аз тавоноии рақиб огоҳ ҳастем, чанд бор бо ҳамдигар бозӣ кардаем ва медонам, ки ин дастаи пурқувват аст. Ҳадафи аслии мо дар Ҷоми Осиё-2024 то ҳадди имкон пеш рафтан ва соҳиби роҳхат ба Ҷоми ҷаҳонӣ шудан аст. Умедворам, ки ба мақсади худ мерасем”,-гуфта буд Пайрав Воҳидов.

Яҳё МАҲМАДНАБИВ, “ҶТ”