Имрӯз, 29 июн дар Мактаби ҷумҳуриявии маҳорати олии варзишӣ оид ба намудҳои гӯштин марҳилаи дуюми “Фестивали бозиҳои миллии варзишӣ” дар шаҳри Душанбе бахшида ба 20-солагии Рӯзи Ваҳдати миллӣ ва “Соли ҷавонон” оғоз гардид, ки дар он намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Раёсати кор бо ҷавонон ва варзиши шаҳри Душанбе ва масъулини мактабхои варзишии пойтахт иштирок намуданд.

Иброҳим Мирзоев, сардори Раёсати кор бо ҷавонон ва варзиши шаҳри Душанбе ба варзишгарон барои иштироки фаъолонаашон изҳори сипос намуда таъкид кард, ки “Маҳз Ваҳдату Истиқлолият ва сиёсати ҷавонпарваронаи Пешвои муаззами миллат созгор гардид, ки мову шумо дар фазои ободу осуда умр ба сар бурда, баҳри муаррифии миллату давлати азизамон дар арсаи байналмилалӣ ҷаҳду талош намоем".

“Фестивали бозиҳои миллии варзишӣ” аз руи  2 намуди тартиби бозихо -  намоишӣ ва рақобати даставӣ доир карда шуда, он дар “се марҳила (маҳаллӣ, минтақавӣ ва миллӣ) дар остонаи таҷлили иди Наврӯзи ҷаҳонӣ (марҳилаи якум), Ваҳдати миллӣ (марҳилаи дуюм) ва ҷашни Истиқлолияти давлатӣ (марҳилаи сеюм) тасдиқ карда шудааст, ки раисии Кумитаи тадорукотии баргузории фестивали мазкурро Рустами Эмомалӣ, президенти Федератсияи футболи Тоҷикистон ба зима дорад.

Тибқи иттиллои дафтари матбуотии шаҳрдории Душанбе, дар соли 2017 бо дастгирии муҳтарам Рустами Эмомалӣ дар самти рушду инкишофи тарбияи ҷисмонӣ ва варзиш дар пойтахт 35 чемпионату мусобиқаҳои кушоди шаҳри Душанбе оид ба намудҳои варзиши гӯштини миллӣ, юнону румӣ, тарзи озод, самбо, ҷудо, бокс, шоҳмот, шашка, футбол, футболи хурд, баскетбол, волейбол, тӯби дастӣ, таэквандо (ИТФ), бо фарогирии 23 ҳазору 289 нафар, 17 маротиба сафарбаркунии 166 нафар варзишгар ба мусобиқаи ҷумҳуриявӣ, 175 машқҳои субҳгоҳӣ бо ташкили мусобиқаҳои дӯстона бо фарогирии 25 ҳазору 567 нафар, “Фестивали бозиҳои миллии варзишӣ” (марҳилаи якум) ва мусобиқаи гӯштингирӣ дар шаҳри Душанбе ва ноҳияҳои он бо фарогирии 21 ҳазору 810 нафар, мусобиқаҳои кушоди варзишии гӯштини миллӣ, пойгаи аспдавонӣ, волейбол дар байни бонувон ва теннис дар байни наврасону духтарон барои дарёфти ҷоми “Пойтахт-2017” бахшида ба Иди байналмилалии Наврӯз дар шаҳри Душанбе бо фарогирии 24 ҳазору 418 нафар наврасону ҷавонон ва сокинону меҳмонони пойтахт, Нимммарафони байналмилалии Душанбе, Спартакиадаи донишҷӯёни мактабҳои олии Ҷумҳурии Тоҷикистон аз рӯи 6 намуди варзиш бо фарогирии 900 нафар варзишгар, нахустин мусобиқаи варзишии “Веломарафон” бо фарогирии 1143 нафар, мусобиқаи кушоди пойгаи аспдавонӣ бахшида ба Рӯзи ҷавонони Тоҷикистон ва мусобиқаи варзишии Дави миллӣ дар шаҳри Душанбе, дар умум 243 чорабинии варзишӣ бо фарогирии 116 ҳазору 723 нафар (аз ин шумора 10 ҳазору 733 нафар бонувон) гузаронида шудаанд.

Тавре манбаъ афзуд, баҳри баргузории чорабиниҳои варзишӣ дар шаҳри Душанбе 1 миллиону 32 ҳазору 920 сомонӣ ҷудо гардида, баҳри фарогирии наврасону ҷаванон ба машғулиятҳои варзишӣ мусоидат намудааст. Ҳамчунин барои татбиқи сиёсати давлатии сохаи варзиш дар шаҳри Душанбе ба 10 мактаби махсуси захираҳои олимпии шаҳри Душанбе зиёда аз 6 миллион сомонӣ маблағ ҷудо гардидааст, ки ин иқдом метавонад, дар рушди соҳаи варзиш мусоидат намояд.