Дар клуби футболи “Хуҷанд”-и шаҳри Хуҷанд баъди дар даври плей-оффи Ҷоми Конфедератсияи футболи Осиё-2018 аз тими “Аҳал”-и Туркманистон шикаст хӯрдани даста сармураббӣ ва директори клуб иваз карда шуд.

Ба ҷои Рустам Хоҷаев, Нуъмонҷон Юсуфов, ба ҳайси сармураббӣ интихоб шуд. Ба иттилои сомонаи расмии Федератсияи футболи Тоҷикистон, Муродҷон Умаров директори клуб таъин гардидааст. Ӯ дар ин мақом Шавкат Иброҳимовро, ки аз моҳи июли соли 2016 фаъолият дошт иваз намудааст.

Тими футболи “Хуҷанд”, дорандаи медалҳои нуқраи Чемпионати Тоҷикистон дар даври плей-оффи Ҷоми Конфедератсияи футболи Осиё-2018 аз тими “Аҳал”-и Туркманистон шикаст хӯрд.

Шогирдони Рустам Хоҷаев натавонистанд, дар рақобатҳои мазкур бозии хубро ба мухлисон ва роҳбарияти клуб нишон диҳанд. Тағироти мазкурро ба натиҷаи нишондодаи даста дар даври плей-оффи Ҷоми Конфедератсияи футболи Осиё-2018 рабт медиҳанд.

Муаррифии сармураббӣ Нуъмонҷон Юсуфов ва директори нави клуб Муродҷон Умаров дар толори конфронси Варзишгоҳи “20-солагии Истиқлолияти Тоҷикистон” бо иштироки Рустам Раҳматзода, муовини аввали раиси вилояти Суғд доир гардид.