Варзишгарони гиромӣ, собиқадорон ва мураббиёни варзиш, мухлисон ва дӯстдорони соҳа.

Қаблан мехоҳам ҳамаи Шуморо бо ҷашни «Рӯзи варзишгарон» муборакбод намоям.

Боиси ифтихор аст, ки дар натиҷаи ба даст овардани Истиқлолияти давлатии Ҷумҳурии Тоҷикистон ва ба тасвиб расидани созишномаи истиқрори сулҳ, соҳаи тарбияи ҷисмонӣ ва варзиш дар маркази таваҷҷӯҳи бевоситаи Асосгузори сулҳу ваҳдати миллӣ, Пешвои миллат, қарор гирифт.

Маҳз Истиқлолияти давлат ва таваҷӯуҳи падарони Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон боиси он гардид, соҳаи тарбияи ҷисмонӣ ва варзиш яке аз самтҳои афзалиятноки сиёсати иҷтимоии Ҳукумати мамлакат пазируфта шуд ва тамоми санадҳои дахлдор ба хотири таъмини оммавияти варзиш, таҳкими тарзи ҳаёти солим, мусоидат намудан ба омодакунии варзишгарони касбӣ ва ба ин васила муаррифӣ намудани давлату миллат дар арсаи байналмиллалӣ роҳандозӣ гардид.

Қобили қайд аст, ки ҳанӯз аз замонҳои қадим мардуми мо ба тарбияи ҷисмонӣ ва варзиш рағбати зиёд дошта онро ҳамчун воситаи муҳими беҳдошти саломатӣ, ташаккули ҷисмониву маънавӣ ва мустаҳакам намудани дӯстӣ байни қавмҳо васеъ истифода намудааст.

Гузашта аз ин ҷавононро баҳри ҳимояи арзишҳои миллӣ ва дар руҳияи ватандӯстию худшиносӣ ба камол расонидан аз усулҳои гуногуни варзиш, аз қабили давидану ҷаҳидан, найзапартоиву шамшерзанӣ, гурзпартоиву камонварӣ, аспдавонию чавгонбозӣ, гӯштину шиноварӣ ва амсоли инҳо кор мегирифтанд ва ин мероси гузаштагон то ба мо омада расидааст.

Қобили зикр аст, ки мувофиқи маълумотҳои оморӣ аз 1 январи соли ҷорӣ 8590 иншооти варзишӣ новобаста аз шакли моликияташон дар ҷумҳурӣ қайд гардидааст, ки аз ин 111 варзишгоҳ, 6056 майдончаи варзишӣ, 1610 толорҳои варзишӣ, 83 ҳавзҳои шиноварӣ ва 730 маҷмааҳо, иншоотҳои махсуси варзишӣ аз қабили тир, боулинг, фитнес ва клубҳои ихтиёрӣ фаъолият менамоянд.

Танҳо соли 2015 дар шаҳру ноҳяҳои ҷумҳурӣ 82 иншооти варзишӣ бо харҷи зиёда аз 139 885 279 (яксаду сиву нӯҳ миллиону, ҳаштсаду ҳаштоду панҷ ҳазору, дусаду ҳафтоду нӯҳ) сомонӣ сохта, ба истифода дода шудааст.

Дар ин давра варзишгарони мамлакат дар як катор чорабиниҳои байналмилалӣ, чемпионатҳои ҷаҳон, Осиё, Бозиҳои олимпӣ, Бозиҳои Осиёӣ, Шоҳҷомҳо иштирок намуда, ба дастовардҳои таърихии даврони истиқлолият ноил гардиданд.

Имрӯзҳо дар шаҳри Рио Де-Жанейрои давлати Бразилия Бозиҳои ХХХI тобистонаи олимпӣ баргузор гардида истодааст, ки дар он варзишгарони мо низ иштирок доранд ва онҳоро ба «Рӯзи варзишгарон» табрик намуда, барояшон сарбаланди орзу менамоям.

Бори дигар бо самимияти бепоён шуморо ба ифтихори "Рӯзи варзишгарон" ва 25 солгарди Истиқлолияти давлатӣ муборакбод гуфта, бароятон бурдбориву комёбиҳои беназир таманно дорам.

Ҳамеша сарбаланду дастболо бошед!