3 декабр бо ташаббуси Донишкадаи молия ва иқтисоди Тоҷикистон таҳти номи «Муаммоҳои инкишофи туризми байналхалқӣ дар Ҷумҳурии Тоҷикистон» конференсияи илмӣ-амалии байналмилалӣ доир гардид. Дар он олимону муҳаққиқон, коршиноси маҳҳалӣ ва хориҷии соҳаи сайёҳӣ, намояндагони вазорату идораҳои ҷумҳурӣ ва дигар сохторҳои марбута иштирок карданд.

Конфронсро ректори донишкада Ашурбой Солеҳзода ифтитоҳ ва аз саҳми Ҳукумати кишвар ҷиҳати дастгирии соҳаи туризм ёдовар шуда, изҳор дошт, ки Тоҷикистон барои рушди самтҳои гуногуни туризм имкониятҳои фаровон дорад. Ҳарчанд дар ин бахш аз ҷониби ширкатҳои сайёҳӣ кӯшишҳои зиёд ба назар мерасанд, вале ин басанда нест, зеро дар баробари туризми содиротӣ бояд туризми воридотӣ низ рушд ёбад. Дар самти тарбияи кадрҳои тахассусманд низ чанде аз муассисаҳои таҳсилоти олии касбӣ машғуланд то бозори меҳнатро бо кадрҳои лаёқатманди рақобатпазир таъмин созанд. Дар ин замина, баланд бардоштани сатҳи хизматрасонӣ ба сайёҳон дар мадди аввал аст.

Муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Ризо Назарзода дар мавзӯи «Туризми Тоҷикистон: мушкилот ва дурнамо» баромад кард. Ӯ қайд намуд, ки дар соли 2015 дар ҷаҳон аз ҳисоби туризм 1,5 триллион доллар маблағ ба даст омадааст, ки баробари 10% маҷмӯи маҳсулоти дохилии ҷаҳон мебошад. Имрӯз ҳар 16-ум ҷойи кории сайёра ба соҳаи сайёҳӣ рост меояд. Дар Ҷумҳурии Тоҷикистон низ беш аз 30 санади меъёрию ҳуқуқӣ барои танзими сиёсати давлатӣ дар соҳаи туризм қабул гардидаанд, ки барои рушди ин соҳа мусоидат менамояд. Сокинони 81 кишвари дунё метавонанд аз се фурудгоҳи байналмилалии Тоҷикистон соҳиби раводид шаванд. Ба наздикӣ раводиди электронӣ ҷорӣ гардид. Ин иқдомҳо сафари хориҷиёнро ба кишвари мо бамаротиб осонтар менамоянд. Тоҷикистон хусусан дар самти туризми экологӣ, тиббӣ, фарҳангӣ-таърихӣ имкониятҳои фаровон дошта, борҳо ҳамчун кишвари зеботарин ва мусоид барои сайёҳон дар ҷаҳон эътироф гашта, дар раддабандиҳо дар мақомҳои аввал қарор гирифтааст. Соли 2017 бошад, бо пешниҳоди Ташкилоти умумиҷаҳонии туристӣ соли туризми устувор эълон гаштааст.

- Афзалиятҳои ба рушди туризм мусоидаткунанда дар кишвар туризми экологӣ, имконияти дар чор фасли сол қабул кардани сайёҳон, ҷашни Наврӯзи байналмилалӣ ва Шоҳроҳи бузурги Абрешим аст, - гуфт дар охир Ризо Назарзода.

Регина Гаутлина - коршиноси соҳаи туризм, ки Ҷумҳурии Қирғизистонро намояндагӣ мекунад, изҳор дошт, ки тӯли шаш моҳ аст дар Тоҷикистон фаъолият мебарад ва ба ояндаи дурахшони туризми кишвар некбин аст. Ба гуфтаи номбурда, афзалияти асосии туризми Тоҷикистон дар он зоҳир мегардад, ки ҷойҳои диққатҷалбкунандаи сайёҳӣ дар тамоми минтақаҳои он ба назар мерасанд ва аз махсусиятҳои нодири табиӣ бархӯрдоранд.

Мудири Бахши ҷавонон, варзиш ва сайёҳии ноҳияи Варзоб Раҷабалӣ Турсунзода дар мавзӯи «Варзоб - минтақаи сайёҳӣ: мушкилот ва дурнамо» маърӯза кард. Изҳор дошт, ки диёри зебоманзараи Варзоб дорои захираҳои фаровони туристӣ буда, дар ҳудуди он 145 намуд растании шифобахш мерӯяд. Чашмаҳои маъдании он низ барои рушди туризми тиббӣ мусоидат менамояд. Пас аз эълон шудани Варзоб ҳамчун минтақаи туристӣ дар самти туризм тадбирҳои зиёд андешида шуд. Айни замон дар ноҳияи Варзоб беш аз 460 минтақаи истироҳатӣ ба меҳмонону сайёҳон хизмат мерасонанд.

Раиси Ассотсиатсияи мададгор ба ташкилотҳои туристии Тоҷикистон Фаттоҳ Файзуллоев ва вакили Маҷлиси намояндагони Маҷлиси Олӣ Рустам Қудратов низ дар баромади хеш бобати афзалият ва зарурати рушди туризм ибрози назар намуданд.

Баъдан Холназар Муҳаббатов, профессори кафедраи туризми Донишгоҳи давлатии омӯзгории Тоҷикистон ба номи С. Айнӣ дар мавзӯи «Зарурати рушди туризм дар Ҷумҳурии Тоҷикистон», Иван Самсон, коршиноси хориҷии Лоиҳаи Иттиҳоди Аврупо, профессори Донишгоҳи Гренобл (Фаронса) ва Мисқола Абдуллоева, роҳбари Ширкати сайёҳии «Orom-Trevel» дар мавзӯи «Рушди туризми дохилӣ дар заминаи соҳибкории хурду миёна» баромадҳои пурмазмун карданд.

Аз ҷумла Иван Самсон модели рушди туризмро дар давлати Швейтсария мисол оварда, самтҳои дар кишвари мо амалишаванда, аз қабили агротуризм, ташкили инфрасохтори махсус ва истифодаи захираҳоро муҳим шуморид.

Пас аз анҷоми маърӯзаҳо маҳфили саволу ҷавоб ва музокира сурат гирифт. Р. Назарзода ба роҳбарияти ДМИТ пешниҳод кард, ки барои ворид намудани донишкада ба Анҷумани мактабҳои олии туризми назди Ташкилоти умумиҷаҳонии туристӣ, ки қароргоҳаш дар шаҳри Мадриди Испания аст, дархост пешниҳод намояд. Зеро ин ташкилот барои баланд бардоштани малакаи касбомӯзии муҳассилини риштаи туризм имкониятҳои васеъ дорад.

Машҳура АБДУЛЛОЕВА
Насрулло ТӮЙЧИЗОДА