МУАЛЛИФ: БЕҲРӮЗ ХОЛМУРОДОВ

Имрӯз, 22-юми феврал, дар Кумитаи ҷавонон, варзиш ва сайёҳии назди Ҳукумати ҷумҳурӣ, бо мақсади мусоидат намудан ба рушди устувори соҳаи туризм ва ҷалби таваҷҷуҳи ҷомеа ба муаррифии имконият ва захираҳои сайёҳии Тоҷикистони биҳиштосо, ҳамзамон, ҳавасманд гардонидани субъектҳои хоҷагидори соҳаи сайёҳӣ, мутахассисони соҳа, меҳмонхонаҳо ва иншооти хизматрасонӣ, ки дар рушди соҳаи сайёҳии мамлакат саҳм мегузоранд, “Маросими ҷоизасупорӣ ба хотири саҳмгузорӣ дар рушди сайёҳӣ дар Тоҷикистон – 2016” баргузор гардид.

Аҳтам Абдуллозода, раиси Кумитаи ҷавонон, варзиш ва сайёҳӣ ҳангоми ифтитоҳи чорабинӣ иброз дошт, ки бо талошҳои пайваставу созанда ва собитқадамонаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар заминаи сиёсати хирадмандонаи “Дарҳои кушод”, шомил гаштани Ҷумҳурии Тоҷикистон аз соли 2007 ба узвияти Созмони умумиҷаҳонии сайёҳӣ барои ворид шудани соҳаи туризми кишвар ба бозори ҷаҳонии туристӣ заминаҳои воқеиро фароҳам овард.



Зикр шуд, ки руйхати мамлакатҳое, ки барои гирифтани раводид бо тариқи соддакардашуда дар 3 фурудгоҳи байналмилалии Тоҷикистон иҷозат доранд, аз 68 адади тартиби пештар амалкунанда, ба 78 адад расидааст. Ҳамзамон бо 10 давлати дунё тартиби бераводид амал менамояд. Аз моҳи июни соли 2016 бошад, тартиби электронии раводиди Тоҷикистон баҳри таъмини ташрифоти бештари сайёҳон ба кишвар оғоз гардид. Ҷуғрофияи ташрифоти сайёҳони хориҷӣ ба ҷумҳурӣ васеъ гашта, аз 59 давлат дар соли 2015 ба 109 давлат дар соли 2016 расид. Дар ин давра раванди ҷалби сайёҳон ба кишвар зиёд гашта, давоми се соли охир, ташрифоти сайёҳон 2 маротиба афзоиш ёфт. Дар ин ҷараён дар асоси Консепсияи миллии рушди соҳаи сайёҳӣ, Тоҷикистон бояд то соли 2020 зиёда аз 1 миллион сайёҳро ба кишвар қабул намояд.

Гуфта шуд, ки яке аз ҳадафҳои аслии чорабинӣ андешидани тадбирҳои судманд баҳри ҳарчи бештару беҳтар тарғибу ташвиқи иқтидору захираҳои туристии Тоҷикистон, инчунин ҷалб намудани ҷавонон ба соҳаи туризм ва омодасозии кадрҳои соҳаи туризм, алалхусус роҳбаладҳо дар макотиби сатҳи олӣ, масъалаҳои қабул ва пешкаш кардани хизматрасонии муносиб ба туристони хориҷӣ маҳсуб меёбад.



Бо итминони комил зикр гардид, ки ҳамкорӣ ва саъю кӯшиши мақомот ва ширкатҳои туристӣ сабаби эҳёи босуръати рушди соҳа гардида, ба таъмини шаҳрвандон бо ҷойҳои кории нав, беҳтар гардидани сифати зиндагии мардум ва аз ҳама муҳим, омили мусоидаткунанда барои ба раванди ҷаҳонии туризм шомил шудани давлатамон ҳамчун кишвари осоишта ва дорои иқтидори бузурги туристӣ бо пешниҳоди хизматрасонии муносиб боис мегардад.

Дар интиҳои чорабинӣ фаъолони соҳаи сайёҳӣ бо ҷоизаву дипломҳо қадрдонӣ шуданд.

Рӯйхати ҷоизадорони соҳаи сайёҳӣ дар соли 2016:

- Ширкати беҳтарини сайёҳии сол (воридотӣ) – “Ориент Адвентур”;
- Ширкати беҳтарини сайёҳии сол (содиротӣ) – “Восток Тревел Тур”;
- Беҳтарин ширкати муаррифкунандаи имкониятҳои сайёҳии Тоҷикистон (дохилӣ) – Муассисаи сайру сайёҳати Иттифоқҳои касабаи Тоҷикистон;
- Беҳтарин роҳнамо (гид), роҳбалади сол – Дилдорбеков Ориз;
- Беҳтарин меҳмонхонаи бренди сайёҳидошта – “Лотус”;
- Беҳтарин муассисаҳои табобатӣ ва истироҳатӣ – Маҷмааи лижаронию сайёҳии “Сафед-дара”;
- Беҳтарин ВАО, ки имкониятҳои сайёҳии кишварро бештару беҳтар таблиғ кардааст – телевизиони “Тоҷикистон”;
- Беҳтарин савғотӣ барои сайёҳон – тоқии тоҷикӣ, муаллиф - Давлатбӣ Ёдгорова;
- Беҳтарин мақолаи сайёҳӣ – “Тоҷикистон ҷавҳари кашфношуда ва минтақаи ҷолиби диққат барои сайёҳон” - муаллиф - Хоҷаев Абдулло;
- Беҳтарин бизнес-плани сайёҳӣ – Лоиҳаи истеҳсоли маҳсулоти туристӣ ва савғотии беҳтарин ба туристон - муаллиф - Қурбонова Зарина.