Имрӯз, 20 июл, Аҳтам Абдуллозода, раиси Кумитаи ҷавонон, варзиш ва сайёҳӣ бо Тариқ Иқбол Сумро, сафири Ҷумҳурии Исломии Покистон дар Тоҷикистон мулоқот кард. Дар мулоқот ҳамкориҳои дуҷонибаи Тоҷикистону Покистон дар риштаҳои гуногун, махсусан варзиш ва сайёҳӣ мавриди баррасӣ қарор гирифт.

Аҳтам Абдуллозода зикр кард, ки туризм яке аз соҳаҳои ҷавон дар Тоҷикистон ба ҳисоб рафта, ҳамкориҳои мутақобилан судманди тамоми мақомоту идораҳо ба татбиқи босамар ва босифати сиёсати давлатӣ дар туризм ва беҳтар сохтани фазои фаъолият дар ин самти муҳим ба иқтисодиёту иҷтимоиёт заминаи мусоид хоҳад буд. Ифтитоҳи хатсайри ҳавоии Душанбе-Лоҳур аз муқаррароти созишномаҳои миёни кишварҳо дар ҷодаи сайёҳӣ аст.

Тариқ Иқбол Сумро дар навбати худ зикр кард, ки ҳамкориҳои дуҷонибаи Тоҷикистону Покистон дар соҳаҳои гуногун дар ҳоли густаришт аст. Равобити дутарафаи кишварҳо ба мо имкон медиҳад, ки рушди соҳаи туризм ва воридоти сайёҳонро ба ду мамлакати бо ҳам дӯст афзоиш диҳем. Мо шодем, ки парвоз дар хатсайри Душанбе-Лоҳур ба роҳ монда шуд. Ин барои соҳибкорон ва сайёҳон бениҳоят хуб аст, чунки онҳо аз ин пас бе ягон мушкил рафту омад карда метавонанд. Бо ин роҳ мо метавонем сафи туристонро нисбат ба солҳлои қаблӣ бештар намоем.

Тариқ Иқбол дар охир иброз дошт, ки ҳамкориҳои дуҷониба барои рушди соҳаи сайёҳӣ ва соҳаҳои дигари кишварҳо судманд мебошад.

Раиси Кумитаи ҷавонон, варзиш ва сайёҳӣ низ дар навбати худ аз мулоқот бо сафири Покистон изҳори қаноатмандӣ карда, гуфт, ҷиҳати рушди соҳаи туризм ҳамкориҳоро боз ҳам қавитар хоҳанд намуд.