Ҳамасола теъдоди зиёди сайёҳон ба хотири дидорбинии яке аз пиряхҳои калонтарини Осиёи Миёна - Федченко воқеъ дар ноҳияи Ванҷ, ки 70 километр  дарозиву  3 км паҳноӣ дорад, ташриф меоранд.

Имсол ҳам ба тағйирёбии иқлими ҷаҳон нигоҳ накарда, теъдоди бисёре аз сайёҳони хориҷӣ аз пиряхи мазкур дидан мекунанд. Новобаста аз он, ки мувофиқи тавзеҳоти охири мутахасисон, пиряхи Федченко аз андозаи аслии худ қариб як километр кам гардидаст ва қисми поёнии пиряхҳо, дар тӯли ҳашт километр кафида, бо кӯлҳои пиряхӣ табдил ёфтаанд. Барои аксарияти сайёҳони хориҷӣ ҳоло ҳам ин мӯъҷизаи зеботарин ва нотакрори табиати мавзеи Ванҷи боло ҳамто надорад.

Ба гуфти Масрур Ғайратов, мудири шӯъбаи бахши ҷавонон, варзиш ва сайёҳии ноҳияи Ванҷ дар ноҳия ҳамчунин дигар мавзеҳои сайёҳӣ ба мисли истироҳатгоҳи дараи Зинг, Парки Миллӣ, маҷмаи сайёҳии Ванҷи боло, обҳову чашмаҳои дармонбахш ва ғайра мавҷуданд. Лекин сайёҳони хориҷиро аз ҳама беш пиряхи мазкур ва манзараҳои дилфиребе, ки гирду атрофи онро иҳота кардааст, ҷалб месозад . Дар нимсолаи аввали соли ҷорӣ воридшавии сайёҳон ба ноҳия бештар мушоҳида шуд. Лекин дар охири фасли баҳор  аз сабаби обхезии бардавоми чашмаҳои ноҳия, ҳамагуна роҳҳо сӯи Ванҷи боло маҳкам гардида, сайёҳон тарафи роҳи  Душанбе – Хоруғ мерафтанд. Ҳозир бошад сайёҳат ҷониби пиряхи Федченко роҳандозӣ гардида, ҳамарӯза даҳҳо нафар ба ин мавзе ташриф меоранд мегуяд,- Масрур Ғайратов,

Масрур Ғайратов таъкид кард, ки дар мавзеи Ванҷи боло лагери истироҳатӣ низ мавҷуд аст. Он дар давраи собиқ Иттиҳоди шӯравӣ бунёд ёфта солҳост, ки  рӯи тамирро надидааст. Маҳз дар ҳамин макон сайёҳон як рӯз дам гирифта, баъдан ҷониби пиряхи Федченко мераванд.

Мувофиқи тавзеҳоти мавсуф агарчи солҳои охир дар маркази ноҳия шаш меҳмонхонаи замонавӣ ифтитоҳ ёфтанду хизматрасонии сайёҳӣ ба андозае беҳтар гардид, аммо дар самти роҳбаладии сайёҳон, муошират бо забонҳои хориҷӣ ё худ набудани тарҷумони ихтисосманд камбудиҳо мушоҳида мешаванд.