21 сентябр бо ибтикори Кумитаи ҷавонон, варзиш ва сайёҳӣ бахшида ба Рӯзи умумиҷаҳонии сайёҳӣ, ки ҳамасола 27 сентябр дар тамоми ҷаҳон ҷашн гирифта мешавад, дар Литсейи касбии хизмат ва сайёҳии шаҳри Душанбе мулоқоти намояндагони Кумита бо устодон ва хонандагон доир гардид.

- Мақсад аз баргузории вохӯрӣ ин бештару беҳтар кардани тарғибу ташвиқи захираҳои туристии Тоҷикистон, ҷалб намудани ҷавонон ба соҳаи сайёҳӣ ва омодасозии кадрҳои соҳа, алалхусус роҳбаладҳо дар шароити кӯҳӣ дар макотиби таҳсилоти олии касбӣ, масъалаҳои қабул ва пешкаш кардани хизматрасонии муносиб ба туристони хориҷӣ ба ҳисоб меравад. Инчунин, татбиқи самараноки Барномаи рушди сайёҳӣ дар Ҷумҳурии Тоҷикистон дар давраи солҳои 2015-2017, ба талаботи муосири бозори соҳаи сайёҳӣ мутобиқ намудани дониши муассилин, тарғибу ташвиқи мероси бойи таърихию фарҳангӣ, захираҳои табиию рекреатсионӣ, мавзеъҳои туристии кишвар ва ҷалби ҷавонон ба донишандӯзӣ арзёбӣ карда шуд, - иброз намуд Абдукарим Қурбонов, сармутахассиси Раёсати рушди туризми Кумитаи ҷавонон, варзиш ва сайёҳӣ.

Зикр гардид, ки тарбияи кадрҳои баландихтисоси соҳа, таъсиси хатсайрҳои нави ҳавопаймоӣ, таблиғи захираҳои туристии кишвар низ аз мушкилотеанд, ки садди роҳи рушди сайёҳӣ дар кишвар мешаванд. Кумита ҳамчун масъули соҳаи мазкур дар ҳамкорӣ бо сохторҳои дахлдори давлатӣ ва ширкатҳои марбута пайваста ҷиҳати муваффақ шудан дар самти рушди сайёҳӣ ва рафъи мушкилоти ҷойдошта тадбирҳои судманд меандешад. Бо мақсади ба роҳ мондани механизмҳои муосири омори ҷаҳонгардӣ ва муайян намудани шумораи аниқи мутахассисони соҳаи сайёҳӣ, ки дар макотиби олии кишвар омода мегарданд, дар ҳамкорӣ бо Вазорати маориф ва илми ҷумҳурӣ соли гузашта ва 6-7 моҳи соли равон дар тамоми муассисаҳои олӣ ва миёнаи махсуси кишвар вохӯрӣ ва семинару омӯзишҳо доир гашт, ки зимни ин чорабиниҳо ҷавонон аз нозукиҳои соҳаи сайёҳӣ огаҳии бештар пайдо мекунанд.

-Рӯнамоии санъати меҳмоннавозӣ, дар арсаи байналмилалӣ муаррифӣ намудани Тоҷикистон ҳамчун давлати демократӣ, дунявӣ, ягона бо мероси ғании фарҳангию таърихӣ ва тараққиёфта аҳамияти муҳим дорад ва барои расидан ба ҳадафи ниҳоӣ бояд дар ниҳоди мардум масъулияти баланди шаҳрвандӣ, эҳсоси худшиносиву ватандӯстӣ, маҳорати олии хизматрасониро ташаккул ва такомул диҳем,-иброз дошт намояндаи Кумита .

Дар фарҷом байни намояндгони Кумита ва хонандагон вобаста ба мавзӯи дар боло зикршуда саволу ҷавоб сурат гирифт.