Дар арафаи ҷашни 25-умин солгарди Рӯзи Истиқлолияти давлатии Ҷумҳурии Тоҷикистон бо ибтикори Кумитаи ҷавонон, варзиш ва сайёҳии назди Ҳукумати ҷумҳурӣ дар шаҳри Душанбе ду чорабинии сатҳи байналмилалӣ дар соҳаи туризм баргузор мегардад.

Фардо - 2 сентябр дар меҳмонхонаи "HYATT Regency"-и шаҳри Душанбе дуюмин Конфронси байналмилалии сайёҳӣ таҳти унвони «Тоҷикистон ҷавҳари кашфношуда: мушкилот ва дурнамо», 3 сентябр бошад, дар Боғи "Ирам"-и пойтахт Фестивали фарҳангиву сайёҳии Мероси Роҳи Абрешим таҳти унвони «Рангоранг» ва дар заминаи он ярмаркаи ҳунармандии Тоҷикистон дар назар аст.



Дар чорабиниҳои мазкур иштироки намояндагони вазорату идораҳои дахлдори ҷумҳурӣ, масъулини соҳаи сайёҳии давлатҳои хориҷӣ, коршиносон, сафирону кормандони корпуси дипломатӣ, ташкилотҳои байналмилалӣ ва намояндагони соҳаи сайёҳии Тоҷикистон иштирок менамоянд.

Қобили тазаккур аст, ки ҷиҳати инъикоси иқтидор ва имкониятҳои сайёҳии Тоҷикистон дар хориҷи кишвар, хусусан ҷараёни кори конфронс ва Фестивали сайёҳиву фарҳангӣ ташрифи намояндагони васоити ахбори оммаи кишварҳои Иттиҳоди Давлатҳои Мустақил ба нақша гирифта шудааст, ки он дар ҷалби сайёҳон аз ин кишварҳо ва муаррифии Тоҷикистон дар хориҷ созгор мебошад.