Ҳамасола 5 декабр ҳамчун Рӯзи байналмилалии волонтёрон дар тамоми дунё таҷлил мегардад. Дар Тоҷикистон низ солҳои охир фаъолияти ихтиёриён ва ё волонтёрӣ ба назар мерасад ва ба дараҷаи бояд рушд ҳам кардааст. Махсусан дар чорабиниҳои сиёсию фарҳангӣ фаъолияти ин намуди хизматрасонӣ дида мешавад, ки инро метавон рушди ин соҳа дар кишвар арзёбӣ намуд. Ҳарчанд ин раванд дар кишварҳои Аврупо дарбаргирандаи қишрҳои гунонуни ҷомеа мебошад, дар кишвари мо аксар он нафароне, ки ба волонтёрӣ машғуланд, ҷавонон мебошанд. Бахшида ба саннаи мазкур ва фаъолияти волонтёрӣ дар Ҷумҳурии Тоҷикистон рӯзномаи “Ҷавонони Тоҷикистон” суҳбате орост бо Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон.

- Аз он рӯзе, ки фаъолияти волонтёрӣ дар назди Кумитаи кор бо ҷавонон ва варзиш ба роҳ монда шудааст, то имрӯз чӣ натиҷа ба даст овардед?

- Бо дастгирии бевоситаи Асосгузори сулҳу ваҳдати миллӣ - Пешвои муаззами миллат, Ҷаноби Олӣ муҳтарам Эмомалӣ Раҳмон фаъолияти волонтёрӣ барои рушди малакаҳои зеҳнӣ, инкишофи маънавӣ, рушди истеъдодҳо, анҷом додани амалҳои хайрхоҳона ва ба ин васила тарбия намудани ҷавонон ва барои соҳибтахассус гаштани онҳо соли 2013 Қонун “Дар бораи фаъолияти волонтёрӣ” қабул гардид ва дар асоси Қарори Ҳукумати Ҷумҳурии Тоҷикистон аз 5 марти соли 2014 Кумитаи кор бо ҷавонон ва варзиш ҳамчун мақоми ваколатдори давлатӣ дар соҳаи фаъолияти волонтёрӣ муайян шуда, сиёсати давлатиро дар ин самт пиёда месозад. Бо ин далел ҳоло дар Тоҷикистон ҳаракати волонтёрӣ тадриҷан инкишоф меёбад ва ба яке аз падидаҳои сутуданӣ мубаддал мешавад. Дар айни замон, ҳам дар Тоҷикистон ва ҳам дар тамоми ҷаҳон фаъолияти волонтёриро ҳамчун воситаи кӯмакрасони давлату ҷомеа пазируфтаанд. Дар олам одамони зиёде ба воситаи фаъолияти волонтёрӣ ба рушди иҷтимоӣ ва иқтисодии ҷомеаи худ саҳм мегузоранд. Ба ин тариқ, фаъолияти волонтёрӣ ба васеъ гардидани имкониятҳо ва устувории ҷомеаи шаҳрвандӣ мусоидат менамояд.

Метавон гуфт, ки аз замони таъсисёбӣ то ин ҷониб волонтёрони мо якҷанд зинаҳоро тай намуданд. Бо ин васила мо тавонистем, ҷавонони ҷумҳуриро ба ҳам наздиктар кунем. Ҷалби ҷавонон ба шуғли волотёрӣ сабаб гардид, ки сафи ҷинояткорӣ аз мактабҳо сар карда, то дар сатҳи ҷумҳурӣ коҳиш ёфт. Волонтёрӣ ба қавле саркардагони мактабҳоро ба касбомӯзӣ баргардонид.

Ба ин васила мо ба як оилаи бузурге табдил ёфтем, ки тавассути ризокорӣ, нафърасонӣ ва ташаббускорӣ барои боз ҳам ободу зебо гардонидани Ватани маҳбубамон саъю талош карда истодаем.

- Имрӯз шумораи волонтёрон чи қадар аст ва фаъолияти онҳо ба назари Шумо дар кадом сатҳ қарор дорад?

- Имрӯзҳо зиёда аз панҷ ҳазор нафар дар ҷумҳурӣ ба фаъолияти волонтёрӣ машғул аст ва ин шумора дар ҳоли зиёдшавӣ қарор дорад. Зеро ҷавонон имрӯз моҳияти аслии волонтёрро дарк карда истодаанд. Таваҷҷӯҳи Роҳбарияти олии мамлакат, ҷалби онҳо дар ҷорабиниҳои сатҳи баланд шумораи онҳоро рӯз аз рӯз зиёд карда истодааст.

Волонтёрӣ имрӯз барои соҳаи кор бо ҷавонон ва варзиш як мактаби бузурги омода намудани кадрҳо ба ҳисоб меравад. Мо ин таҷрибаро аллакай роҳандозӣ кардем. Он волонтёроне, ки солҳои қабл дар чорабиниҳо худро ба ҳайси ризокор муаррифӣ мекарданд, имрӯз кормандони фаъоли самти кор бо ҷавонон ва варзиш мебошанд. Чаро кормандони фаъол гуфтам онҳоро? Чун онҳо мактаби волонтёриро гузаштаанд ва имрӯз дар баробари хизматчии давлатӣ будан аз фаъолияти волонтёрӣ канор нарафтаанд. Зеро онҳо моҳияти аслии ризокор буданро ҳис кардаанд. Ва метавон гуфт, ки фаъолияте, ки дар ин мудати кӯтоҳ доранд, қаноатмандкунанда мебошад.

- Фаъолияти волонтёриро мактаби аз худ кардани таҷрибаҳо мегӯянд. Шумо дар ин мавзӯъ чӣ назар доред?

- Бале, ризокорӣ мактаби бузурги таҷриба аст. Дар баробари ин фаъолияти волонтёрӣ қудрати муттаҳидсозиро дорост. Пирӯзии одамон бар ҳама гуна мушкилот аз муттаҳидию сарҷамъии онҳо маншаъ мегирад. Парокандагию тафриқандозӣ ба инсонҳо танҳо харобию бадбахтӣ меорад. Аз ин рӯ, ояндаи кишвар ва рушду нумуи он ба ваҳдат, ҳамкорию ҳамбастагии ҷавонон вобастагии қавӣ дорад. Волонтёрӣ василаи хуби муттаҳидсозии насли ҷавон аст. Ҷавон он вақт такмил меёбад, ки ҷамъияти зиёдеро бубинад ва дӯстони зиёде дошта бошад. Мактаби волонтёрӣ дунёи ташаккули ҷавонон аст. Фаъолияти волонтёрӣ дар замони муосир барои ҷавонон мактаби бардошти таҷрибаҳову имкониятҳо ба шумор меравад. Ҷавононе, ки имрӯз фаъолияти волонтёрӣ доранд, метавонанд худро дар дилхоҳ самт санҷишу озмоиш намоянд. Маҳз волонтёрӣ дар ҳамаи самту соҳаҳо имкони бардошти таҷриба гаштааст. Фаъолияти волонтёрӣ барои ҷавонони зиёд баҳри такмилу ташаккул имконоти мусоидро фароҳам овард. Волонтёрон дар баробари хизмати содиқона ба ҷомеаву халқ истеъдоди худро нишон дода, кишвари азизамонро дар миқёси ҷаҳон муаррифӣ менамоянд.

- Ба андешаи Шумо волонтёрӣ ба як ҷавон чӣ медиҳад?

- Фаъолияти волонтёрӣ фаъолиятест, ки ҳазорсолаҳо дар миёни мардуми мо бо шаклҳои гуногун вуҷуд дошт ва падарону бобоёни мо ин навъи фаъолиятро бо мақсади ободу зебо гардонидани Ватан, густариши худшиносии миллӣ ва дӯст доштани сарзамин, обёриву дасти кӯмак расонидан ба шахсони ниёзманд истифода менамуданд. Дар даврони соҳибистиқлолӣ ҷавонони фаъоли кишвар бо ташаббусҳои наҷибона дар партави сиёсати оқилонаи Пешвои маҳбуби кишвар чун пайравони асили Пешвои миллат дар роҳи ободонию созандагии ба ин навъи фаъолияти ҷамъиятӣ мепардозанд.

Аслан, хайр кардану дар хидмати ҷомеа будан бузургтарин манфиати маънавиро меорад. Аз амали хайру савоб инсон роҳату ҳаловати равонӣ мебарад. Фаъолияти волонтёрӣ ба ҷавон пеш аз ҳама имкон медиҳад, робитаи худро бо ҷомеа мустаҳакам намояд. Мушкилоту проблемаи ҷомеаро дарк кунад. Ин зинаи аввалини хизмат ба халқ аст. Ин фаъолият ба ҷавон шахси ватандӯсту хештаншинос, меҳанпарвару накӯкор буданро омӯзонад. Дӯстони нав, шахсиятҳои бузург ва хирадманд, ҷавонони соҳибистеъдоду ихтироъкорро дар ҳаёташ пайдо намуданро имкон медиҳад. Ба қавли дигар волонтёрӣ минбарест, ки ҷавон худро аз он бо хислатҳои ҳамидаю иқдомҳои созанда ба ҷомеа муаррифӣ мекунад. Гузашта аз ин, нафароне, ки аз ин мактаби бузург гузаштаанд, имрӯзҳо бо донишу малака ва таҷрибаи аз худ карда дар вазифаҳои гуногуни хизматчии давлатӣ аз рӯи касбу кори мухталиф фаъолият доранд.

- Дар оянда барои боз ҳам хубтару беҳтар гардидани фаъолияти волонтёрӣ чи нақшаҳо доред?

- Фаъолияти волонтёрии мо дар доираи Ташкилоти ҷамъиятии “Пайравони мешвои миллат” ба роҳ монда шудааст. Шиори мо пайравӣ аз Пешвои муаззами миллат аст. Ин масъулияти бузург моро водор менамояд, ки ҳамеша ҳушёру зирак бошем, бар зидди тамоми омилҳои номатлуб ва фаъолияти қувваҳои носолими ҷомеа мубориза барем, дар замири худ ватандориро нисбати гиромидошти арзишҳои миллӣ парварем, дили ғамхор дошта бошем ва ҳамеша барои дареғ надоштани неруи инсонии худ ҷиҳати дастгирии ниёзмандон ва пешрафти Тоҷикистони азизамон омода бошем. Ин фурсатро истифода намуда, миннатдории худро ба раиси Федератсияи футболи Тоҷикистон муҳтарам Рустами Эмомалӣ мерасонам, ки то имрӯз тамоми чорабиниҳое, ки мо баҳри мутаҳидии волонтёрон дар сартосари ҷумҳурӣ роҳандозӣ мекунем, таваҷҷӯҳи махсус зоҳир намуда, сарпарастӣ менамоянд.

Дар оянда нақша дорем, ки ин оилаи мо, яъне волонтёрон фарогири натанҳо ҷавонон, балки фарогири тамоми қишри ҷоме бошад ва мо дар якҷогӣ баҳри ободию сарсабзии ин диёри биҳиштосо –Тоҷикистони азиз, саҳмгузор бошем.