Таҳти ин унвон, имрӯз 24 сентябр дар толори Филармонияи давлатии Тоҷикистон ба номи Акашариф Ҷӯраев ҳамоиши ҷавонони соҳаи фарҳанг ва санъати Тоҷикистон баргузор гардид.

Дар ҳамоиши мазкур муовини якуми раиси Кумитаи кор бо ҷавонон ва варзиши назди Ҳукумати кишвар Назарзода Ризо, муовини якуми вазири фарҳанг Назариён Обид, намоянда аз оркестри симфонии Дастгоҳи иҷроияи Президенти Ҷумҳурии Тоҷикистон Хуҷаста Мирзовалиева, раиси ҷавонони Донишкадаи давлатии санъати тасвирӣ ва дизайн Наврӯз Саидов, роҳбари ансамбли эстрадии “Ориё”-и Кумитаи телевизион ва радиои назди Ҳукумати Ҷумҳурии Тоҷикистон Муҳаммадрофеи Кароматулло ва ҷавонони фаъоли пойтахт ширкат варзиданд.


Назарзода Ризо, муовини якуми раиси Кумитаи кор бо ҷавонон ва варзиш дар оғози чорабинӣ иброз дошт, ки фарҳанг ҳастӣ ва чеҳраи аслии миллат ба шумор меравад. Номбурда аз ҷумла қайд намуд: “Имрӯз 70 дарсади аҳолии кишварро ҷавонон ташкил медиҳанд, ки ин нишонаи қувваи бузургу созанда ва неруи пешбарандаи Тоҷикистон будани онҳо мебошад. Ин барои ҷавонон масъулияти хеле баланд аст ва онҳо ҳуқуқи бетараф будан нисбати ин миллату давлатро надоранд. Дар даврони ҷанги шаҳрвандии солҳои 90-уми қарни гузашта, аҳолии кишвар зери зулму шиканҷа қарор дошт. Ба бахти миллати тоҷик фарзонафарзанди ин диёр Эмомалӣ Раҳмон сари қудрат омада, Тоҷикистонро аз нестӣ раҳонид ва миллати тоҷикро, ки баъд аз ҳазор соли бедавлатӣ боз соҳибистиқлол гардид, ба зиндагии шоиста раҳнамоӣ намуд”.


  
Дар идома иштирокчиёни дигари ҳамоиш – Хуҷаста Мирзовалиева, Муҳаммадрофеи Кароматулло ва Навруз Саидов зимни суханронии худ оид ба тарафдории номзади арзанда ибрози андеша карданд.

Дар охир аз ҷониби Асадуллоев Насриддин, ҳунарпешаи театри Академии драммавии ба номи Абулқосим Лоҳутӣ изҳороти ҷавонони соҳаи фарҳанг ва санъат ироа гардид.

Саида Нарзизода, “ҶТ”