Бо иштироки намояндагони Раёсати кор бо ҷавонон ва варзиши ВМКБ, мақомоти иҷроияи маҳаллии ҳокимияти давлатии ноҳияи Ишкошим ва ҷавонон дар мавзӯи “Ифротгароии ҷавонон: омилҳо ва роҳҳои пешгирии он” мизи мудаввар доир гардид.

Сураҷ Чоршанбиев, корманди раёсат зимни баромади хеш қайд кард, ки ба туфайли мақомоти дахлдори кишвар солҳои охир аз ҳисоби ҷавонони вилоят ба гурӯҳҳои ифротгаро касе шомил нашудааст. Аммо чунин тамоюл дар ҷаҳон ҳанӯз ҳам боқӣ монда, оқибатҳои онро ҷавонон бояд возеҳ дарк намоянд:

“Зиёдшавии ҳаракатҳои тундгароиву террористӣ дар ҷаҳон ҳамаи моро ҳушдор медиҳанд, то нуктасанҷ бошем ва ба вазъият бо дидаи ҳақиқатбин баҳо дода, бедориву ҳушёриро ба кор барем” – афзуд С. Чоршанбиев.

Дар охири чорабинӣ ба ҷавонони фаъолу ташаббускори ноҳия аз тарафи раёсат ифтихорномаҳо тақдим гашт.