Бо ташаббуси Кумитаи кор бо ҷавонон ва варзиши назди Ҳукумати ҷумҳурӣ таҳти сарпарастии президенти Федератсия футболи Тоҷикистон Рустами Эмомалӣ рӯзи 25 сентябри соли ҷорӣ дар толори фарҳангии Донишгоҳи славянии Русияву Тоҷикистон бахшида ба “Соли ҷавонон” аввалин ҳамоиши гирандагони стипентияҳои президентӣ ва квотаҳои президентӣ баргузор гашт.

Ҳамоиши мазкур таҳти шиори “Пайравони Пешвои миллатем”, бо иштироки Раиси Кумтаи кор бо ҷавонон ва варзиш Аҳтам Абдуллозода, муовини аввали вазири маориф ва илми кишвар Раҳматулло Мирбобоев, намоянда аз Академияи илмҳои Тоҷикистон, гирандагони стипендия ва квотаҳои президентӣ аз тамоми манотиқи ҷумҳурӣ, доир гардид.

Дар қисмати расмии ҳамоиш таҳти уновони “Пайравони Пешвои миллатем” Аҳтам Абдуллозода, Раҳматулло Мирбобоев ва намоянда аз Академияи илмҳои Тоҷикистон суханронӣ намуда, иштирокчиёнро барои аз худ намудани дониши баланд ва сазовор гаштан ба номи пуршарафи гирандагони стипентияҳои президентӣ ва квотаҳои президентӣ табрик намуданд.

Раиси Кумтаи кор бо ҷавонон ва варзиш зимни ифтитоҳи чорабинӣ ва суханронии худ қайд намуд, ки дар замони кунунӣ масъалаи сиёсати давлатии ҷавонон дар меҳвари асосии сиёсати пайгиронаи Пешвои миллат, муҳтарам Эмомалӣ Раҳмон қарор дошта, Ҳукумати кишвар баҳри дастгирии ҳамаҷонибаи ин қишри ҷомеа, ҳидоят кардани насли ояндасоз ба омӯзиши таъриху тамаддуни аҷдодӣ, тарбияи хештаншиносию ватанпарастии ҷавонон ва аз ҷониби онҳо маҳкум кардани тамоми зуҳуроти номатлуб силсилаи тадбирҳои судмандро роҳандозӣ карда истодааст. “Имрӯз мо бо ҳар яки шумо ифтихор мекунем. Чунки шумо дар замиратон нерӯи бузурги зеҳнӣ ва иқтидори ҷисмоние доред, ки метавонед барои боз ҳам рушду нумӯ ёфтани давлати азизамон саҳми босазо гузоред”, афзуд Аҳтам Абдуллозода.

Ҳамчунин, Саъдулло Юсупов, намоянда аз шаҳри Душанбе ва роҳбари Маҳфили стипендиантони ҷавони Кумитаи кор бо ҷавонон ва варзиш, Ошурбекова Давлатнисо, гирандаи квотаи президентӣ ва намоянда аз ВМКБ, Мирзозода Моҳсафар, гирандаи стипендияи президентӣ дар соли хониши 2017-2018 ва намоянда аз вилояти Хатлон ва Шоҳрух Юнусов, гирандаи стипендияи байналмилалии Президенти Ҷумҳурии Тоҷикистон “Дурахшандагон” маърӯза намуда, баргузории ҳамоиши гирандагони стипендияҳои президентӣ ва квотаҳои президентиро нишонаи олии таваҷҷуҳи Роҳбарияти Олии кишвар ҳисобида, барои дастгириҳои пайваста ва ғамхориҳои падаронаи Пешвои миллат миннатдории хешро иброз доштанд.

Аз ҷумла онҳо зикр намуданд, ки: “Боиси ифтихор ва сарфарозии ҳар яки мо – ҷавонон аст, ки ҳавасманд намудани муҳассилони муассисаҳои таҳсилоти умумӣ, ибтидоӣ, миёна ва олии касбӣ нишонаи пойдории сулҳу субот дар ҷомеа ва ғамхориҳои беназири давлат ва Ҳукумати ҷумҳурӣ, махсусан Пешвои муаззами миллат нисбат ба насли ояндасозӣ кишвар аст”.

Дар анҷоми қисамати расмии чорабинӣ раиси Кумтаи кор бо ҷавонон ва варзиш шаҳодатномаҳои гирандагони стипендияҳои президентиро дар соли 2017-2018 ба ғолибони озмунҳо барои дарёфти стипендияи президентӣ тақдим намуд.

Ҳамчунин, аз ҷониби иштирокчиёни ҳамоиш муроҷиатномаи гирандагони стипендияҳои президентӣ ба самъи ҳозирин расонида шуд.

Баъдан барномаи фарҳангии гирандагони стипентияҳои президентӣ ва квотаҳои президентӣ пешкаши ҳозирин гардонида шуд.

Ҳамоиш бо сайри гирандагони стипендия ва квотаҳои президентӣ дар “Боғи Ирам”-и шаҳрӣ Душанбе ба анҷом расид.

Ёдовар мешавем, ки яке аз механизмҳои ҳавасмандӣ ва дастгирии иҷтимоии ҷавонон ин таъсиси стипендияи президендӣ барои хонандагон мебошад. Стипендияи мазкур бо мақсади фаъолгардонии насли ҷавони кишвар ва дастгрии шахсони болаёқат бо назардошти вазъи иқтисодиёти миллӣ тайёр намудани мутахассисон аз ҷониби собиқ Кумитаи кор ҷавонон ва варзиш пешниҳод гардида, бо Фармони Президенти Ҷумҳурии Тоҷикистон аз 26-уми феврали соли 1998 таъсис ёфтааст. То соли 2005 стипендия барои 100 нафар ба андозаи панҷкаратаи маоши ҳадди ақал пешбинӣ шуда буд. Бо Фармони Президенти Ҷумҳурии Тоҷикистон аз 14 июли соли 2005 шумораи гирандагони стипендияи президентӣ ба 300 адад расонида шуда, то ба имрӯз 4300 нафар хонандагони болаёқат сазовори стипендияи президентӣ гардидаанд. Маблағи стипендияи президентӣ ҳамасола аз ҳисоби буҷети давлатӣ пешбинӣ мешавад.