МУАЛЛИФ: МАШҲУР ИМОМНАЗАР

Бо ташаббуси Раёсати ҷавонон, варзиш ва сайёҳии ВМКБ дар шаҳри Хоруғ маҳфили доимамалкунандаи «Ихтиёрини ҷавон» таъсис ёфт, ки минбаъд дар ташаккулёбӣ ва рушду фаъолияти ҳаррӯзаи ҷавонону наврасон мусоидат мекунад.

Дар ин бора сардори Раёсати ҷавонон, варзиш ва сайёҳии ВМКБ Ризо Раҳматшоев хабар дода, гуфт, ки ҳадаф аз ташкил додани он тақвияти ҳамкориҳои ҷавонону наврасон, фаъолияти арзандаи онҳо барои беҳбуди ҳаёти иҷтимоӣ, иқтисодӣ ва фарҳангӣ, рушди худидоракунии ҷавон ва саҳмгузории онҳо дар риштаи сайёҳии кишвар аст.

Маҳфил дар асоси Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавон” ва Қонуни Ҷумҳурии Тоҷикистон “Дар бораи фаъолияти волонтёрӣ” рӯи кор оварда шуда, феълан 100 нафар аъзо аз ҳисоби ҷавонону наврасони вилоят ба он шомил гардиданд.

Мувофиқи тавзеҳоти Сураҷ Чоршанбиев, муовини сардори Раёсати ҷавонон, варзиш ва сайёҳии вилоят, аъзои маҳфил, ки минбаъд ҳамчун ризокор фаъолият менамоянд, мувофиқи пурсишномаҳои вижа интихоб гардиданд. Ризокорон фаъолияти худро тариқи баргузории ҷаласаҳо, семинару конфронсҳо, чорабиниҳои фарҳангиву фароғатӣ, тарғибу ташвиқи тарзи ҳаёти солим байни аҳолӣ пиёда хоҳанд кард.