ҶАВОНОН
Душанбе 06 Феврал 2023 07:51
8770
Ё иқдоме, ки 11 500 ҷавондухтарро соҳибмаълумот кард  

Дар Ҷумҳурии Тоҷикистон сол аз сол сафи ҷавондухтароне, ки аз ҷониби Ҳукумати кишвар дастгирӣ ва ба макотиби олӣ тариқи квотаҳои президентӣ равона карда мешаванд, афзоиш меёбад. Дар замони соҳибистиқлолӣ зиёда аз 11 500 нафар ҷавондухтарон муассисаҳои таҳсилоти олии касбии кишварро бо Квотаи президентӣ хатм кардаанд.

Пешвои миллат дар Паёми охирашон масъалаи дастгирӣ ва ҳавасмандгардонии ҷавонони лаёқатманду соҳибмаърифатро баррасӣ намуда, қайд намуданд, ки: “Дар замони истиқлолият 11 500 нафар духтарон аз ноҳияҳои дурдасти кӯҳистон муассисаҳои таҳсилоти олии касбии кишварро бо Квотаи президентӣ хатм кардаанд. Дар ин давра 222 ҳазор нафар духтарон муассисаҳои таҳсилоти олии касбиро хатм намуда, ҳоло боз 100 ҳазор духтарон дар ин муассисаҳо таҳсил карда истодаанд. Аз 42 ҳазор нафар донишҷӯёни мо, ки дар муассисаҳои таҳсилоти олии касбии кишварҳои хориҷӣ таҳсил доранд, зиёда аз 8 ҳазор нафарашон духтарон мебошанд”.

Бояд гуфт, ки Ҳукумати кишвар имрӯз стратегия ва барномаҳоеро рӯи кор меорад, ки барои дастгирии занон ва ҷавондухтарон дар соҳаҳои гуногуни кишвар мусоидат мекунад. Ин аст, ки Сарвари давлат дар Паёми охири хеш ба Маҷлиси Олии кишвар таъкид намуданд, ки стратегия ва барномаҳои заруриро таҳия ва ба Ҳукумати кишвар пешниҳод кунад.

- Бо мақсади амалӣ намудани ҳадафҳои “Стратегияи миллии рушди Ҷумҳурии Тоҷикистон барои давраи то соли 2030” ҷиҳати то 30 фоиз расонидани хизматчиёни давлатӣ ва то 25 фоиз расонидани кадрҳои роҳбарикунанда аз ҳисоби занону бонувони лаёқатманд дар муҳлати се моҳ “Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону бонувони болаёқат барои солҳои 2023 –2030” таҳия ва ба Ҳукумати мамлакат пешниҳод карда шавад”,-таъкид доштанд Сарвари давлат.

Яке аз нафароне, ки тариқи Квотаи президентӣ айни замон дар Донишгоҳи миллии Тоҷикистон таҳсил мекунад, Нилуфар Бомуродова аз шаҳри Панҷакент аст. Ӯ мегӯяд, “агар ҳар кас саъю кӯшиш кунад ва аз пайи омӯзиши илм шавад, ҳатман чунин имкониятҳо насибаш мегардад”.

- Ман имрӯз аз он хушҳолам, ки тариқи Квотаи президентӣ донишҷӯӣ ДМТ ҳастам. На ҳама метавонад тариқи Квотаи президентӣ донишҷӯ шавад. Чун ноил шудан ба он донишу малакаи зиёдро талаб мекунад. Барои ҳамин ҳам, мо - ҷавонон бояд пайваста илму ҳунар омӯзем ва кӯшиш намоем, ки чунин имкониятҳоро, ки ояндаи моро равшан мегардонад, аз даст надиҳем,-мегӯяд Нилуфар.

Инчунин ӯ мегӯяд, имрӯзҳо ҷавондухтарон барои соҳибкасб шудан, дигар монеа надоранд ва онҳо бояд ин имкониятҳоро аз даст надиҳанд.

- Аввалҳо аз забони мардуми мо як ибора хело зиёд шунида мешуд: “Занро чию хонданаш чи”. Аммо имрӯзҳо ҳар падару модаре мехоҳад, то фарзандаш хонад, чун ҷомеаи мо демократӣ аст ва дар баробари писарон духтарон ҳам ҳаққи хонданро доранд. Ман гумон мекунам, босавод будани зан дар оила ин бениҳоят муҳим аст. Агар зан хонаду кор ҳам накунад, ӯ метавонад дар хона ба фарзандонаш дониш омӯзонад.

Имрӯзҳо боиси ифтихор аст, ки духтарони ҷавони мо метавонанд, озодона фикру ақидаи хешро дар бораи дилхоҳ мавзӯъ баён намоянд. Онҳо дигар ба хубӣ дарк намудаанд, ки савод доштан дар зиндагӣ нақши хело муҳим дорад. Мушоҳидаҳои якчанд вақти охир нишон медиҳад, ки ҷавондухтарони мо пайи илму дониш доим дар талошанд ва мекушанд, ки дар баробари гирифтани ихтисос дар донишгоҳу муассисаҳои таълимӣ боз донандаи якчанд забонҳои хориҷӣ бошанд.

Шоира Давлатзода, яке аз ҷавонони фаъ-ол, ки ҳам иштирокчии озмуни ҷумҳуриявии “Фурӯғи субҳи доноӣ китоб аст” ва ҳам гирандаи Квотаи президентӣ аст, мегӯяд, дар сабқате аз фанни таърихи халқи тоҷик ва умумӣ иштирок намуда, бали аз ҳама баландро соҳиб гашт ва ҳамин гуна донишҷӯи ДМТ гардид. Имрӯз ӯ дар факултаи таърих дар ихтисоси таърихи ватанӣ ва умумӣ таҳсил мекунад.

- Маҳз дастгирии садорати факултет ва садорати ДМТ буд, ки дар соли 2021 дар озмуни ҷумҳуриявии "Фурӯғи субҳи доноӣ..." дар даври ниҳоӣ сазовори ҷои сеюм гардидам. Ман миннатдории хешро ба Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мерасонам, ки имрӯз мо - ҷавонон бо истифода аз иқдомҳои пешгирифтаи эшон метавонем, дар дилхоҳ соҳаи интихобнамудаамон пешрафт намоем,-қайд намуд ҳамсуҳбати мо.

Шоира ният дорад, ки донишгоҳро бо сари баланд хатм намуда, дар оянда бо касби муаррихӣ кору фаъолияташро идома диҳад.

- Ҷавобан ба ин ҳама ғамхориҳову дастгириҳои пайвастаи Пешвои миллатамон ваъда медиҳам, ки бо саъю кӯшиш бомуваффақият таҳсили худро идома дода, ҳамчун муаррих ба халқу ватани хеш хизмат намоям,-илова намуд Шоира.

Ситора Додова, донишҷӯдухтар аз ноҳияи Рашт аст. Ба ӯ низ насиб гашта, ки соҳиби Квотаи президентӣ гардад, имрӯз аз он изҳори қаноатмандӣ мекунад, ки дар баробари таҳсили ройгон, ҳамзамон бо ҷойи хоб ва Стипендияи президентӣ таъмин аст.

- Духтароне, ки ба тариқи квотаҳои президентӣ сазовори номи донишҷӯ мешаванд, ҷои хобашон бе пул аст. Моро ҳар моҳ ба Стипендияи президентӣ таъмин мекунанд. Ин барои ҳар як ҷавон фурсати хело хуб аст.

Таҳлилҳо нишон доданд, ки дар Тоҷикистон ҷалби занону духтарон ба корҳои давлатию ҷамъиятӣ нисбати дигар ҷумҳуриҳои собиқ шӯравӣ бештар буда, онҳо имконияти дар тамоми соҳаҳо санҷидани малакаву дониши худро доранд.

Зуҳро РИЗОЗОДА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 1 2 3 4 5

Феврал 2023 c.