Бо иқдоми Бахши ҷавонон, варзиш ва сайёҳии шаҳри Хоруғ ва донишҷӯёни курси 3 - и Шуъбаи логопедӣ ва дефектологияи факултаи биологияи Донишгоҳи давлатии Хоруғ ба номи Моёншо Назрашоев дар толори фарҳангии ташкилоти “Маркази Нур” чорабинии идона ба муносибати Рӯзи ғалаба баргузор гашт, ки дар он омӯзгорон, мураббиён, падару модар ва дастпарварони ташкилот ширкат намуданд.

Тавре роҳбари муҳассилини ташаббускор, муаллимаи калони кафедраи педагогика ва психологияи ДДХ Паринамо Дастамбуева иттилоъ дод, барои дастгирӣ ва кӯмак ба кӯдакони дорои имконияташон маҳдуд донишҷӯён дар ҳамбастагӣ бо дигар ҷавонони шаҳр пайваста талош доранд.

“Чунин чорабиниҳо ба хотири дилхушии кӯдакони нуқсондор, ҷалби онҳо ба фароғату таълим нигаронида мешаванд. Донишҷӯён ба ин васила бо атфол алоқамандии бештар пайдо мекунанд. Феълан муҳассилин дар иртибот бо кӯдакони маъюб муносибати хуб барқарор намуданд ва он дар фаъолияти таҷрибаомӯзии онҳо низ нақши муаассир хоҳад дошт,” – гуфт П. Дастамбуева.

Ёралӣ Холдоров, муовини мудири Шуъбаи кор бо ҷавонони донишгоҳ гуфт, ки чунин иқдом аз тарафи донишҷӯён амали неку хайрхоҳона аст ва ба он дар оянда донишҷӯёни бештар шарик мешаванд.

Машҳур ИМОМНАЗАРОВ, “ҶТ"