Қурбонҳусейн Ёрасенов, дониш-ҷӯи курси дуюми Донишгоҳи аграрӣ ба номи П.А. Столипинаи шаҳри Уляновскии Федератсияи Русия ва бозингари беҳтарини дастаи “Улгау” дар донишгоҳ аст. Аз айёми кӯдакӣ ӯ дар маҳаллаи худ ба бозии футбол машғул буд. Дар мактаб низ ба фанни тарбияи ҷисмонӣ шавқу рағбати зиёд дошт. Падару модари ӯ ин дилбохтагиашро дида, кӯшиш мекарданд, ки фарзанди онҳо дар ҷодаи интихобкардааш муваффақ шавад. Ҳамеша дар талош буданд, ки ӯро дар ягон дастаи футбол барои тамрин гузоранд, то футболбози хуб шавад ва ҳамин тавр ҳам карданд.   

Дар синни 12 - солагӣ бо пешниҳоди устодони мактабаш ӯро ба дастаи “Панҷшер” - и вилояти Хатлон дохил намуданд ва Қурбонҳусейн маҳорати худро дар ин даста мукаммалтар намуд. Дар дастаи “Панҷшер” ӯ таҳти рақами 9 бозӣ мекард. Баъди бозии хуб нишон додан, мураббии дастаи “Панҷшер” Бахтиёр Ҳакимов ҳамчун бозингари хуби даста бо ӯ зиёд тамрин мекард.   

“Дар дастаи “Панҷшер” 8 сол бозингарӣ карда, ду карат чемпион дар вилояти Хатлон гардидам. Баъди бозии хуб нишон додан, маро дар даста бозингари беҳтарин донистанд. Дар баробари тамрини зиёд, дарсҳои мактабамро низ бо баҳои хубу аъло хондам, то дар оянда на фақат варзишгари хуб, балки соҳиби ягон касби нағз низ шавам”,- гуфт Қурбонҳусейн.

Ӯ баъди хатми мактаби миёна бо маслиҳати падару модар ба Донишгоҳи аграрӣ ба номи П.А. Столипинаи шаҳри Уляновскии Федератсияи Русия дохил шуд. Ӯ дар донишгоҳи мазкур факултети муҳандисиро интихоб намуда, таҳсилашро давом дод. Аммо аз соҳаи варзиш худро дур накард. Гарчанде соли аввали таҳсил барои ӯ мушкил буд, вале кӯшиш мекард, ки барои тамрин вақт ҷудо кунад.

Ба ақидаи ӯ варзиш, бахусус футбол ҳамчун ҷанбаи муҳими ҳаёти иҷтимоӣ ва неруи тавоно, волотарин шароитро баҳри инкишофи имконоти зеҳниву рӯҳӣ ва ҷисмонӣ фароҳам меоварад. Барои варзишгари хуб шудан, бояд нозукиҳои ин соҳаро аз худ намуд. Барои бозингари хуб будан, дар даста бояд ҳама вақт оромиро нигоҳ дошт. Ғизои солим истеъмол намуд. Аз тамрин набояд дурӣ ҷуст ва ҳамеша супоришҳои мураббиро ба анҷом расонид. Он гоҳ дар ин самт муваффақ хоҳӣ шуд.   

Воқеан, ҷисман неруманду обутобёфта будан, дар натиҷаи машқҳои пайвастаи варзишӣ ба кас муяссар мешавад. Ҳамаи заҳмату талошҳои ин ҷавони варзишгар буд, ки имрӯз дар дастаи “Улгау” шаҳри Уляновский ҳамчун бозингари намунавӣ шинохта шудааст. Алексей Воронин мураббии дастаи онҳо буда, барои фаъолияти хуб нишон додани варзишгарони дастааш талош мекунад. Ин аст, ки дар дастаи мазкур ҳамаи ҷавонони фаъоли донишгоҳ фаъолият мекунанд.

Ба гуфтаи Қурбонҳусейн, ӯ бозии нахустинашро дар дастаи “Улгау” – и донишгоҳ соли 2020 таҳти рақами 4 оғоз намудааст. Ӯ дар як соли фаъолияташ дар ин даста тавонист, 6 голи ҳалкунандаи худро ба самар бирасонад. Имсол бошад, баъди фаъолияти хуб нишон додан дар бозиҳои берун аз шаҳр, аз ҷумла дар шаҳри Санкт - Петербург ва ғолибиятро ба даст овардан, ӯ бозингари беҳтарин дониста шуд. Дар донишгоҳ ӯ унвони беҳтарини футболбози дастаро ба худ касб намуд.

“Ҳаминро гуфтаниам, ки дар куҷое бошем, мо тоҷик ҳастем ва доимо барои муаррифии кишвари худ омода ҳастем. Ба худам қавл додам, ки дар баробари варзишгари беҳтарин буданам, муҳандиси хуб шуда, дар оянда ба халқу ватани худ хизмат кунам. Соли дуюм аст, ки дар факултети муҳандисӣ таҳсил дорам. Ин касб душвор аст, аммо кӯшиш мекунам, ки бо сарбаландӣ онро хатм намоям. Аллакай бисёр нозукиҳои онро дарк ва аз худ намудам. Намегузорам, ки баъди хатми донишгоҳ дасти холӣ ба ватан баргардам”, - гуфт, Қурбонҳусейн Ёрасенов.

Қурбонҳусейн мегӯяд, дастгирии ҳамсабақону атрофиёнаш шавқу рағбати ӯро ба ин намуди варзиш боз ҳам афзоиш медиҳад. Ӯ ҳамеша хостори он аст, номбардори ватани азизи худ - Тоҷикистон бошад.

Боиси ифтихор аст, ки рӯз то рӯз шумораи ҷавонони фаъол дар хориҷи кишвар зиёд шуда истодааст. Бахусус дар соҳаи варзиш, ки имрӯз аз ҷониби Ҳукумати кишвар дастгирии ҳамаҷониба мешаванд. Пас ҳар як ҷавони кишвари мо дар баробари таҳсил намудан дар хориҷи кишвар, бояд аз тамрини варзиш дур набошад. Ҳамеша барои муваффақ гардидан дар ин соҳа талош намояд, то номбардори миллату давлати худ бошад.