Барои бартараф намудани мушкилот дар самти имлҳои дақиқ ва рушди минбаъдаи он Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми соли гузаштаи худ ба Маҷлиси Олӣ иброз доштанд, ки солҳои 2020–2040 ”Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон карда шавад.

Боиси ифтихор аст, ки шароити имрӯзаи мо ба ҷавонон имконият медиҳад, ки аз ҳама ғамхориҳои бевоситаи Сарвари давлат хуб истифода бурда, дониши худро мукаммал ва дар пешрафти кишвар саҳмгузор бошанд. Яке аз чунин ҷавононе, ки аз ин имкониятҳо ба тарви шоиста истифода бурдаву дар рушди шахсияти хеш талошҳои зиёд кардааст, Мабатқадамзода Кимиё мебошад.

Ӯ номзади илмҳои кимиё, дотсент, ходими пешбари илмии Пажғӯҳишгоҳи илмӣ-таҳқиқотии Донишгоҳи миллии Тоҷикистон буда, 15 сол аст, ки дар соҳаи кимиё фаъолият дорад. Кимиё соли 2006 баъди хатми факултети химияи ДМТ тасмим мегирад, ки таҳсилашро давом диҳад. Аз ӯ дар давраи таҳсил ҳамчун як донишҷӯи фаъол ном мебурданд. Барои ҳамагон ӯ дар донишгоҳ ҳамеша як ҷавони фаъолу намунавӣ буд.

Чуноне ки ҳамсабақонаш ёдоварӣ мекунанд, Кимиё бештари вақти худро дар китобхона мегузаронд. Доимо барои пайдо кардани як чизи нав дар илм мекӯшид. Ҳамеша орзу мекард, ки дар соҳаи интихобкардаи худ як кашфиёти навро гузаронад. Имрӯз бошад, ин бонуи ташнаи илм ба орзуи деринаи худ расид.
Давоми ду сол дар соҳаи илми кимиё ду ихтироотро ба анҷом расонид. Яке “Тарзи сайқалдиҳии электрохимиявии маснуоти тиллогӣ” ва дигаре “Электролити нуқрапушкунӣ” аст. Ихтирои аввала ба соҳаи усулҳои электрохимиявии коркарди сатҳи хӯлаҳои тилло мансуб буда, дар саноати заргарӣ бештар истифода бурда мешаванд ва ихтирои дигарӣ бошад, барои баланд кардани сифати маҳсулоти нуқрагӣ пешбинӣ шудааст.

Кимиё бо ихтирооти худ “Тарзи сайқалдиҳии электролитии маснуоти тиллогӣ” соли 2018 дар Форуми умумиҷаҳонии занҳои ихтироъкор, ки дар шаҳри Сеули Кореяи Ҷанубӣ баргузор гардид, сазовори ҷойи сеюм гардида, бо медали бринҷӣ сарфароз гардид.

Кимиё муаллифи 4 дастури таълимӣ ва 2 гувоҳнома (нахустпатент) мебошад. Асарҳои илмиаш дар кишварҳои мухталиф бо забонҳои тоҷикӣ, русӣ ва англисӣ нашр ва дастраси хонандагон гардидаанд. Дорандаи Ҷоизаи ба номи Исмоили Сомонӣ дар соли 2017 мебошад. Соли 2019 бо диплопи иштирокчии “Ихтироъкори беҳтарини Точикистон дар солҳои 2017-2018” сарфароз гардидааст. Соли 2021 дар озмуни “Муҳаққики сол” дар соҳаи кимиё ғолиб омада, бо ифтихорнома қадрдонӣ гардид.

Ӯ имрӯз ба тарбияи ҷавонон машғул аст. Кӯшиш мекунад, ки дар соҳаи кимиё мутахассисони баландихтисосро тайёр кунад. Ихтироъкор бошанду ба ҷомеаи имрӯзу фардо хизмат кунанд.

Айни ҳол Кимиё дар омӯзиши хосиятҳои биологии пайвастҳои комплексие, ки дар асоси металҳо ва лигандҳои фаъоли биологӣ ҳосил карда шудаанд, машғул аст. Ва кӯшиш дорад, ки ин омӯзиши худро бо муваффақият ҷамъбаст намояд.

Умедворем, ки сафи чунин ҷавонон дар кишвар зиёд шуда, Тоҷикистонро дар арсаи байналмилалӣ муаррифӣ намоянд. Барои Кимиё дар ихтирооти минбаъдааш барор хоҳонем.