Дар майдони “Оташи абадӣ” -и шаҳри Конибодом ба муносибати гусели гурӯҳи аввалини ихтиёриён ба сафи Қувваҳои мусаллаҳи Ҷумҳурии Тоҷикистон ҷамъомади тантанавӣ баргузор гардид.

Дар ҷамъомад роҳбарияти мақомоти иҷроияи маҳаллии ҳокимияти давлатӣ, ҷамоатҳои деҳот, кормандони комиссариати ҳарбӣ, собиқадорони ҷангу меҳнат, ҷавонону наврасон ва волидайни даъватшавандагон ширкат намуда, 100 нафар ихтиёриёни аввалин ба хизмати Модар- Ватан гусел карда шуданд.

Зимни суханрониҳо гуфта шуд, ки Артиши миллӣ яке аз рукнҳои муҳимтарини давлатдорӣ ва сипари боэътимод маҳсуб ёфта, маҳз бо шарофати хизмати шуҷоатмандонаи хизматчиёни ҳарбӣ мардуми Тоҷикистон имрӯз дар вазъи орому осуда зиндагӣ доранд. Хизмат дар сафи Қувваҳои мусаллаҳ на танҳо уҳдадории шаҳрвандӣ, балки қарзи виҷдониву имонии ҳар як шаҳрванди Ҷумҳурии Тоҷикистон ва вазифаи боифтихори ҳар як ҷавонмарди сарзамин аст.