Дар Кумитаи миллии олимпии Ҷумҳурии Тоҷикистон, 18 апрел, бо ташаббуси Кумитаи кор бо ҷавонон ва варзиши назди Ҳукумати ҷумҳурӣ, дар мавзӯи “Тақвияти ҳамкориҳои самаранок дар самти рушди ҷавонон” мизи мудаввар доир гардид.

Дар он Аҳтам Абдуллозода, раиси Кумитаи кор бо ҷавонон ва варзиши назди Ҳукумати ҷумҳурӣ, намояндагони Иттиҳоди ташкилотҳои кор бо ҷавонони Тоҷикистон (ИТҶТ) ва ташкилотҳои дигари вобаста ба самти ҷавонон ширкат ва суханронӣ намуданд.

Аҳтам Абдуллозода, раиси Кумитаи кор бо ҷавонон ва варзиши назди Ҳукумати ҷумҳурӣ, чорабиниро ифтитоҳ башхида, доир ба нақши ташкилотҳои ҷамъиятӣ, саҳми онҳо дар татбиқи сиёсати давлатии ҷавонон ва фаъолияти босамари онҳо суханронӣ намуданд.

Аҳмадзода Дилноза, раиси Иттиҳоди ташкилотҳои кор бо ҷавонони Тоҷикистон (ИТҶТ) пас аз суханони ифтитоҳӣ чорабиниро идома дода, иброз дошт, ки имрӯз саҳми ташкилотҳои ҷамъияти кор бо ҷавонон дар самти татбиқи сиёсати давлатии ҷавонон назаррас мебошад.

Таъкид гардид, ки Кумита пайваста бо ниҳодҳои шаҳрвандӣ тасмим гирифтааст, ки силсилачорабиниҳоро дар байни ҷавонон ташкил ва баргузор намояд. Ин ҳам бошад, ҷалби ҷавонон ба меҳандӯстиву хештаншиносӣ ва эҳтирому арҷгузорӣ ба муқаддасоти миллӣ мебошад.
  
Дар кори мизи ҳамчунин вобаста ба фаъолияти ташкилотҳои ҷамъиятӣ дар семоҳаи аввали соли 2018 ва ҳамчунин натиҷагирӣ аз татбиқи сифатноки лоиҳаҳое, ки аз ҷониби Кумита дар соли 2017 дастгирӣ гардидаанд, инчунин баррасии эълони грантҳои Ҳукумати Ҷумҳурии Тоҷикистон дар самти тарбияи ватандӯстии ҷавонон барои ташкилотҳои кор бо ҷавонон мавриди омӯзиш қарор дода шуд.