Имрӯз, 12 июн тибқи нақшаи пешбинишуда дар толори Муассисаи давлатии телевизиони “Душанбе” маросими ҷоизасупории маҳфили "Ватанпарвар" дар нимсолаи якуми соли 2026 бо шукӯҳи хосса баргузор шуд.

Дар чорабинӣ Сураҷ Чоршанбезода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Набизода Мадина, муовини якуми раиси Кумитаи кор бо занон ва оилаи назди Ҳукумати Ҷумҳурии Тоҷикистон ва Абдуллоҳи Раҳнамо, сиёсатшинос иштирок ва суханронӣ намуданд.

Зимни суханронӣ таъкид гардид, ки маҳфили “Ватанпарвар” яке аз ташаббусҳои бисёр ҳам фаъол ва муҳими Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба ҳисоб рафта, дар саросари кишвар зиёда аз 500 нафар аъзо дорад. Гуфта шуд, ки маҳфил бо мақсади баланд бардоштани ҳисси ҷавонон дар руҳияи ватандӯстиву ватанпарастӣ, худогоҳиву худшиносӣ ва ҳувияти миллӣ ташкил шуда, фаъолияти муваффақона дорад.

Илова гардид, ки давлату Ҳукумати кишвар ба ҷавонон таваҷҷуҳи махсус дошта, баҳри илмомӯзии онҳо тамоми шароитҳои заруриро фароҳам овардааст. Аз ин рӯ, ҷавононро лозим аст, ки касбу ҳунар омӯзанду ватанпарвар бошанд ва кишвари худро дар арсаи ҷаҳонӣ ба таври шоиста муаррифӣ созанд.

Баъдан, ба иштирокчиён ва аъзоёни фаъоли маҳфил ҷоизаҳо тақдим гардида, барномаи фарҳангӣ пешкаш гардид.
Ёдовар мешавем, ки маҳфили "Ватанпарвар" бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз соли 2025 ташкил шуда, ҳоло дар ҳар гӯшаву канори ҷумҳурӣ аъзоёни худро дорад.

Ин маҳфил дар баланд бардоштани ҳисси ватандӯстӣ, худшиносии миллӣ ва масъулияти шаҳрвандии ҷавонон саҳми назаррас мегузорад. Тавассути чорабиниҳои гуногуни фарҳангӣ, маърифатӣ ва тарбиявии маҳфили мазкур ҷавонон донишҳои худро ғанӣ мегардонанд.

Сафиаллоҳ ИБОДЗОДА,
Рустам САМИЕВ, "ҶТ"