ҶАВОНОН
Сешанбе 01 Декабр 2020 10:06
7074
Ҷавонон дар ҳама давру замон қувваи асосӣ ва неруи бузурги бунёдгару созанда ва пешбурди сиёсати ҳар давлату миллат буданд, ҳастанд ва боқӣ хоҳанд монд. Ҳанӯз чанд ҳазор сол муқаддам файласуфи машҳур Арасту навишта буд, ки “Ҳама касоне, ки аз хусуси санъати идоракунӣ тафаккур намудаанд, бояд фаромӯш накунанд, ки тақдири империяҳо ба тарбияи ҷавонон вобастагӣ дорад”.

Ин буд, ки баъд аз шаш моҳи ба даст овардани Истиқлолияти давлатӣ порлумони кишвар Қонуни Ҷумҳурии Тоҷикистон “Дар бораи сиёсати давлатии ҷавонон”-ро ба тасвиб расонид, ки санади мазкур заминаҳои ташкиливу ҳуқуқии сиёсати давлатии ҷавононро муҳайё ва муайян намуд.

Дар марҳалаҳои минбаъдаи рушди давлатдории миллиамон ҷиҳати пешбурди сиёсати давлатии ҷавонон ва фароҳам овардани шароити мусоид барои инкишофи соҳа як силсила ҳуҷҷатҳои дахлдор, аз ҷумла “Стратегияи сиёсати давлатии ҷавонон дар Ҷумҳурии Тоҷикистон то соли 2020”, “Консепсияи миллии сиёсати ҷавонон дар Ҷумҳурии Тоҷикистон” ва дигар барномаҳои соҳавӣ қабул гардиданд.

Ҷавонон дар меҳвари сиёсат

Мутобиқи нишондодҳои оморӣ ҷавонони то 30-сола ба 70% аҳолии Тоҷикистон баробаранд ва онҳо айни замон қувваи асосии пешбарандаи ҷомеаи имрӯзаи мо ҳастанд. Пас, эшон қувваи бузургеро мемонанд, ки чӣ дар сиёсат ва чӣ дар дигар самтҳои ҷомеа бояд саҳми онҳо созанда бошад. Воқеан, имрӯз ҷавонон дар сиёсати давлатии кишвар чӣ нақши боризе доранд? Оё метавон гуфт, ки имрӯз ҷавонони мо зиракии сиёсиро аз даст надода, дар ин самт фаъоланд?

Сайфулло Муллоҷонов, коршиноси тоҷик мегӯяд, ки ҷавонон агар воқеан хоҳанд, ки барои ҷомеаи имрӯза хизмат кунанд ва дар меҳвари сиёсат қарор гиранд, бояд бо силоҳи донишу басират мусаллаҳ бошанд, чун дар дунёи имрӯз бе илму дониш ва басирати кофӣ наметавон кор ба ҷое бурду муваффақ шуд.

Ба гуфтаи ин коршинос чизи муҳими дигаре, ки ҷавонон бояд онро пайгирӣ кунанд, хештаншиносӣ ва дарки ҳаводиси ҷомеаи имрӯзаи минтақа ва ҷаҳон мебошад. “Чун дунёи имрӯз хеле ноором буда, раванди ҷаҳонишавӣ таъсири худро ба ҷомеаи мо низ мерасонад ва ин таъсиррасонӣ на ҳамеша созандаву муфид аст”,-мегӯяд ӯ.

Бино ба гуфтаи номзади илмҳои сиёсӣ ва раиси шӯрои олимони ҷавон дар вилояти Суғд Шуҳрат Саидзода, ҷавонон чӣ дар гузашта ва чӣ имрӯз дар таҳкими суботу оромӣ ва пешрафти кишвар нақши калидӣ доранд ва ин аст, ки: “Ҳукумати Тоҷикистон аз рӯзҳои аввали соҳибистиқлолӣ бо такя ба ҷавонон сиёсати худро амалӣ намуд. Таваҷҷуҳи давлат, хосса Пешвои миллат солҳои охир нисбати ҷавонон бамаротиб боло рафт. Соли ҷавонон эълон гардидани соли 2017 нишони баланди сиёсати ҷавонпарваронаи Роҳбари кишварро собит намуд”.

Ҷавонон дар паҳлуи Пешвои миллат

Имрӯз, ки Тоҷикистон як давраи мушкил - коронавируси нав COVID-19-ро паси сар мекунад, нақши ҷавонон дар сиёсати давлат чӣ гуна аст ва дар ин ҳолат ҷавонон бояд чӣ корҳоеро ба сомон расонанд?

Ба гуфтаи Шуҳрат Саидзода ҳоло, ки ҷомеаи мо давраи мушкилеро аз сар мегузаронад, вазифаи муҳими ҷавонон ин дар паҳлуи Пешвои миллат қарор доштан ва дастгирӣ намудани сиёсати Ҳукумати Тоҷикистон мебошад. Ҷавонон аз рӯи рисолати инсониву имонӣ ва шаҳрвандиашон вазифадоранд, бо сухану амали хеш барои ҳарчи зудтар берун шудан аз ин вазъият саҳми муносиби худро гузоранд.

Мавсуф меафзояд, ки саҳми ҷавонон дар ин вазъияти ҳассос, ин кумакҳо тариқи фаҳмондадиҳӣ, риояи тавсияи табибон, вобаста ба имконият дасти ёрӣ дароз намудан ба муҳтоҷон ва аз даст надодани умеду боварӣ ба фардои дурахшони Тоҷикистони азиз муҳим аст.

“Боварӣ дорам, ки Тоҷикистон ба зудӣ аз ин давраи вазнин берун мешавад. Чунки аксарияти аҳолии кишвар ҷавонон мебошанд ва онҳо дар зиндагӣ умеду орзуҳои зиёд доранд”,-илова намуд мавсуф.

Сайфулло Муллоҷонов бар он аст, ки дар ҳама ҳолат зиракиии сиёсиро истифода кунанд ва нагузоранд, ки ҳар гурӯҳи сиёсие аз онҳо сӯиистифода намояд.

“Ҷавонон агар мехоҳанд, ки рӯзгор бар асоси хостаҳои онҳо бичархад, нагузоранд, ки ҳар гурӯҳи сиёсӣ ва ё қудратталабе дар роҳи расидан ба ҳадафи худ аз онҳо истифода барад. Ҷавонони имрӯзаи моро халлоқияту ибтикори бештар мебояд, ки худ ҷомеаро бисозанд ва онро ба роҳе раҳнамун созанд, ки расидан ба аҳдофу ормонҳо дар он саҳл бошад”,-иброз намуд ӯ.

Ҳамзамон, номбурда меафзояд, ки дар ин ҳолат ғурури ҷавонӣ набояд монеи он шавад, ки ҷавонон нисбат ба қонун беэътино бошанд, зеро халлоқияту фаъол будан дар ҷомеа ҳаммаъно бо қонуншиканӣ ва зери по гузоштани муқаррароти ҷомеа нест. “Инро аз таҷрибаи талхи солҳои нахустини истиқлол мегӯям, чун дар он солҳо мо шоҳиди он шудем, ки иддае аз ҷавонон хостанд бо шикастану пора кардани низоми мавҷуд ба хостаҳояшон бирасанд ва натиҷа он шуд, ки касе дар хаёлаш ҳам намегузааранд”,-меафзояд ӯ.

Ҷавонон низ ширкати худро дар равандҳои сиёсӣ кумак ба ватани хеш медонанд ва омода ҳастанд, ки ҳамеша ин сиёсатро холисона дастгирӣ намоянд.

Президент дар партави сиёсати давлатии ҷавонон

Вобаста ба сиёсати давлатии ҷавонон Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмон низ борҳо нақши ҷавононро дар сиёсати давлатӣ баҳогузорӣ намудаанд. Президенти кишвар дар паёми шодбошии худ вобаста ба Рӯзи ҷавонон фаъолияти ҷавононро миёни аҳли ҷомеа ва дар ҳаёти сиёсӣ ва иҷтимоиву иқтисодии кишвар бориз хонданд. “Ҷавонони мо тарафдории самимонаи худро аз сиёсати пешгирифтаи давлати Тоҷикистон бо кору рафтори худ собит месозанд. Мо ифтихор дорем, ки ҷавонони кишвар бо асри нав ҳамқадам буда, талаботи замонаи пешрафтаро хуб дарк мекунанд, дар муассисаҳои таҳсилоти олии касбии дохили кишвар ва хориҷ аз он илму дониш меомӯзанд, ба корҳои илмиву таҳқиқотӣ машғуланд, дар раванди ободонии Ватан ва дар бунёди иншооти бузург, аз ҷумла неругоҳи барқи обии “Роғун” саҳми назаррас мегузоранд. Ҷавонони далеру ғаюри мо дар сафҳои Қувваҳои Мусаллаҳ сарбаландона ва содиқона хизмат карда, дар таъмини амнияти давлат, сулҳу оромӣ, суботи сиёсӣ, ваҳдати миллӣ ва ҳифзи дастовардҳои даврони соҳибистиқлолӣ нақши бузург доранд”, -иброз намуданд Президенти кишвар.

Бояд зикр намуд, ки имрӯзҳо лоиҳаи қонунҳои Ҷумҳурии Тоҷикистон “Дар бораи ҷавонон ва сиёсати давлатии ҷавонон”, “Дар бораи тарбияи ҷисмонӣ ва варзиш”, “Стратегияи сиёсати давлатии ҷавонон то соли 2030” ва “Консепсияи миллии сиёсати давлатии ҷавонон дар Ҷумҳурии Тоҷикистон” дар таҳрири нав таҳия гардида истодаанд, ки бо қабули санадҳои мазкур фаъолияти ҷавонон дар ҷомеа боз ҳам беҳтар ба танзим дароварда мешавад.

Эзоҳи худро нависед



Рамзҳо дар расм