Имрӯз зери ин унвон дар Донишгоҳи давлатии тиббии Тоҷикистон ба номи Абӯалӣ ибни Сино конференсияи ҷумҳуриявӣ бахшида ба Рӯзи Президент ва 31-умин солгарди Иҷлосияи 16-уми Шурои Олӣ баргузор гардид.

Конференсияи мазкур бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон роҳандозӣ шуда, дар он муовини Сарвазири Ҷумҳурии Тоҷикистон Матлубахон Сатториён, раиси Кумитаи кор бо ҷавонон ва варзиш Абдулло Раҳмонзода, намояндагони вазорату идораҳо, ташкилоту муассисаҳо, гирандагони Стипендияи президентӣ ва стипендияи раиси шаҳри Душанбе, магистрантону донишҷӯёни фаъоли муассисаҳои таҳсилоти олии касбӣ ва сарбозону афсарон иштирок намуданд.

Нахуст Абдулло Раҳмонзода, раиси Кумитаи кор бо ҷавонон ва варзиш суханронӣ карда, ҳамагонро ба муносибати Рӯзи Президенти Ҷумҳурии Тоҷикистон табрику таҳният намуданд.

Матлубахон Сатториён, муовини Сарвазири Ҷумҳурии Тоҷикистон зимни суханронии худ иброз дошт, ки Пешвои миллат муҳтарам Эмомалӣ Раҳмон аз рӯзҳои аввали роҳбариашон садоқати худро ба миллати тоҷик исбот намуда, тавонистанд, ки дар муддати кӯтоҳ сулҳу суботро ба мардуми тоҷик ба армуғон оваранд.

Гуфта шуд, ки сиёсати давлатии ҷавонон ҳамеша дар меҳвари фаъолияти Роҳбари мамлакат қарор дошта, барои ҷавонон ҳамаи шароиту имкониятҳо фароҳам оварда шудааст.

Г. КАРИМОВА, “ҶТ”