ҶАВОНОН
Панҷшанбе 30 Май 2024 02:37
8029
Ташаккули давлатдории Тоҷикистон дар даҳсолаи аввали ҳазораи нав барои равнақи рӯзафзун, ташаккули бахшҳои мухталифи хоҷагии халқи мамлакат ва муҳимтар аз ҳама роҳ кушодан барои мутобиқати зиндагонӣ ва фаъолият ба ниёзҳои ҷомеаи муосир заминаҳои муҳим ва муассиреро фароҳам оварда истодааст. Ба таври воқеӣ метавон изҳор дошт, ки аз оғози асри нав Тоҷикистон ба як марҳилаи сифатан нави рушду тараққиёти хеш ворид гардида, амалкарди чанд барномаи муҳими давлатиро барои расидан ба ҳадафҳои аслии дурнамои рушди мамлакат аз сар гирифт, ки имрӯз мо метавонем, аз ҷамъбаст ва дар ҳадди зарурӣ аз анҷоми муваффақонаи ин барномаҳои пешрафта, ки ба сивумин солгарди Истиқлолияти давлатии Ҷумҳурии Тоҷикистон моро наздик месозанд, ҳарф занем.

Таваҷҷуҳ ба татбиқи муваффақонаи сиёсати давлатии ҷавонон ва дар ин миён истифода аз неруҳои зеҳнии насли ояндасоз низ дар шумори муҳимтарин равандҳои дурнамои рушди давлат дар даҳсолаҳои минбаъда қарор гирифт. Баргузории мулоқоти Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони ҷавонони мамлакат дар моҳи майи соли 2005 ба таври воқеӣ дурнамои як давраи мукаммали рушду нумӯи фаъолияти ҷавонон ва рисолати аслии эшонро дар ин марҳалаи навини таърихӣ муқаррар намуда буд, ки имрӯз мо аз он ҳидоятномаи Сарвари давлат барои ҷавонон дар ин фосила натиҷаҳои шоён ва боэътимодеро ҷамъбаст мекунем, ки баробари атои қаноатмандии хоса дар ин амр моро ба оғози боз як давраи нави зуҳури корномаҳо мерасонанд.

Таваҷҷуҳ ба ҳаёту фаъолияти ҷавонон ва таъмини рушди соҳаи варзиш дар меҳвари таваҷҷуҳ қарор дошта, мулоқоти пайвастаи Пешвои миллат муҳтарам Эмомалӣ Раҳмон ба ҷавонони кишвар ва дар партави ин мулоқот ба созандагиву бунёдкориҳо рӯй овардани ҷавонони мамлакат саҳифаҳои дурахшони ҳаёти ҷавононро дар раҳгузори истиқлол муаррифӣ намуд.

Таъсиси Ҷоизаи давлатии ба номи Исмоили Сомонӣ дар соҳаи илм дар байни ҷавонон, ки бо Фармони Президенти мамлакат таъсис ёфт, рамзи заҳматҳои ҷавонон дар ҷодаи таҳқиқ ва шинохту маърифати арзишҳои фикрӣ гардид. Дар баробари ин, ҳамасола пешниҳоди ҷавонони эҷодкор бо ҷоизаҳои махсуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар риштаҳои адабиёт, ҳунар, рӯзноманигорӣ ба татбиқи муваффақонаи сиёсати давлатии ҷавонон дар самти дастгирии ҷавонони болаёқат ишорат мефармояд. Эълон гардидани соли 2017 ҳамчун “Соли ҷавонон” аз ҷониби Пешвои миллат таваҷҷуҳи махсуси Сарвари давлатро ба қудрати маънавӣ ва зеҳнии ҷавонон бозгӯӣ мекунад.

Ҳамасола барои тарбияи маънавии ҷавонон дар соҳаҳои мухталифи хоҷагии халқ тадбирҳои зарурӣ андешида мешаванд. Ташкили озмунҳои гуногун истеъдодҳои навро кашф карда, барои ояндаи шукуфои онҳо роҳ мекушояд. Конфронси олимони ҷавони кишвар тозатарин чеҳраҳои маърифатиро муаррифӣ карда, ба сӯи кашфиётҳои нав ба нав ҳидоят менамояд. Озмуни шашмақомсароёни ҷавон барои эҳёи санъати миллӣ ва тарбияи ҳунарварони меҳанпараст ва арҷгузории мусиқии суннатӣ зербинои мустаҳкам мегузорад. Баргузории озмунҳои ҷумҳуриявии “Фурӯғи субҳи доноӣ китоб аст” ва “Тоҷикистон - Ватани азизи ман” низ ҷавонони зиёди огоҳ, ҳунарманд ва соҳибмаърифату аҳли китобро муаррифӣ намуд, ки ин ҳам ба тадбирҳои муҳими давлатӣ дар самти дастгирии ҷавонон аст.

Дар маҷмӯъ, ҳамаи ин дастовардҳои бузурги ҷавонони қарни ХХI - и кишварро бо эътимоди комил метавон меваи истиқлол номид, ки аз баракати ин марҳилаи сарнавиштсози кишвар барояшон муяссар гардидааст. Боварӣ ва эътимоди Пешвои миллат ба неруи ҷавонон ва пайрави асили Пешвои миллат шудани тамоми ҷавонони кишвар имрӯз ба мақоми шоёни насли ояндасоз ва фардоофарин ишорат мекунад.
Баҳри рушди соҳаи варзиш бошад, аз тамоми имкониятҳо истифода мешавад. Пешвои миллат бо муҳаббати беандозаи падарона нисбати насли ояндасози миллат – ҷавонон, махсусан варзишгарони Тоҷикистони соҳибистиқлол таъкид мекунанд, ки: “Ман ҳамеша ба неруи ҷавонон ва ғуруру матонати варзишгарони тоҷик бовар дорам ва аз ҳар як дастовардашон ифтихор мекунам.”

Таърихи пурғановати миллати куҳанбунёдамон шаҳодат медиҳад, ки варзиш аз қадимулайём ҳамқадами аҷдоди номвари мо буда, анъанаи аз хурдсолӣ ба машқҳои ҷисмонӣ ҷалб намудани насли наврас ва омодасозии онҳо барои дифои марзу буми муқаддаси диёр дар ҳама давру замон маъмул будааст.
Ҳанӯз дар замонҳои қадим байни мардум гӯштину найзапартоӣ, камонвариву чавгонбозӣ барин намудҳои варзиш маҳбубият доштанд ва ин анъанаи хуби тарбияи ҷисмониву варзиши миллӣ дар солҳои Истиқлолияти давлатии Ҷумҳурии Тоҷикистон бо рангу тобиши нав зуҳур намуданд.

Маҳз дар муддати 30 соли Истиқлолияти давлатӣ варзиши миллии тоҷик рӯ ба рушд овардаву ба яке аз самтҳои афзалиятноки сиёсати иҷтимоии Ҳукумати Ҷумҳурии Тоҷикистон табдил ёфт ва дар ин замина ҷиҳати оммавигардонии варзиш ва тарғиби тарзи ҳаёти солим байни ҷомеа шароити мусоид фароҳам оварда мешавад.

Бо ибтикори Пешвои муаззами миллат, ҳамчун нишони эътибори хоса ва арҷгузорӣ ба корнамоиҳои ҷавонони миллат дар роҳи истиқрор ва пойдории сулҳу субот, нақши муассири онҳо дар ҳифзу ҳимояи дастовардҳои Истиқлоли давлатӣ ва марзу буми сарзамини аҷдодӣ, рушди соҳаҳои муҳими иҷтимоиёту иқтисодиёти мамлакат Рӯзи ҷавонони Тоҷикистон ба тақвими ҷашнҳои давлатӣ ворид шуда, ҳамасола 23 май бо шукӯҳу шаҳомати хоса таҷлил мегардад.

Ба ҳамагон маълум аст, ки варзиш дар ҳаёти ҳамарӯзаи мардум, хусусан ҷавонон ҳамчун асоси ташаккули солимии ҷисмонӣ ва руҳӣ, рушди маънавӣ, тарғиби ҳамдиливу ҳамфикрӣ ва арзишҳои умумибашарӣ, муҳимтар аз ҳама барои таъмини ҳаёти солими аҳли ҷомеа хизмат мекунад. Имрӯзҳо ҳазорон нафар наврасону ҷавонон бо нияти фатҳи қуллаҳои баланди варзиш маҳз дар пайравии ин ё он варзишгар машқу тамринро идома медиҳанд.

Мо бо варзишгарони умедбахши вилоят Комроншоҳ Устопириён, Ҷаҳон Қурбонов, Муҳаммадхӯҷа Ёқубов, Асрор Воҳидов, Муҳридин Ҳасанов, Ҳамроз Раҷабов, Маҳмад Миров, Абдураҳим Ёқубов, Кристина Пронженко, Фотима Гадоева ва дигарон, ки дар мусобиқаҳои бонуфузи байналхалқӣ соҳиби медалҳои тилло, нуқра ва биринҷӣ гардидаанду Парчами давлатии Ҷумҳурии Тоҷикистонро дар ақсои олам парафшон кардаанд, ифтихор дорем.

Боиси зикр аст, ки алҳол дар вилоят беш аз 2700 иншооти варзишии шакли моликияташон гуногун фаъолият менамоянд, ки дар онҳо дар маҷмӯъ 19,4 ҳазор нафар наврасону ҷавонон ҳамарӯза ба тамрин фаро гирифта шудаанд.

Бунёд ва ба истифода додани инфрасохтори варзишӣ дар вилоят сол аз сол беҳтар гардида, танҳо давоми солҳои 2019 - 2020 ва се моҳи соли равон дар шаҳру ноҳияҳои вилоят 165 иншооти варзишӣ ба маблағи 41,9 миллион сомонӣ аз ҳисоби буҷети маҳаллӣ ва 39,5 миллион сомонӣ аз ҳисоби сарчашмаҳои дигар бунёд ва мавриди истифода қарор дода шудаанд.

Мақомоти иҷроияи ҳокимияти давлатии вилоят ва шаҳру ноҳияҳо тасмим гирифтанд, ки дар доираи нақшаи чорабиниҳои омодагии муҳим ҷиҳати дар соли таърихӣ мавриди истифода қарор додани беш аз 200 иншооти варзишӣ тадбирҳои мушаххасро амалӣ намоянд ва тавре дар боло зикр гардид, кор дар ин самт бо маром идома дорад.

Раҷаббой АҲМАДЗОДА, раиси вилояти Суғд

Эзоҳи худро нависед



Рамзҳо дар расм