Бо ҷалби зиёда аз 300 нафар дар ноҳияи Рӯшон таҳти унвони “Солимии ҷомеа - солимии миллат" аксияи ҷавонону наврасон гузаронида шуд.

Чорабинӣ бо иқдоми Бахши кор бо ҷавонон ва варзиши ноҳия ба муносибати Рӯзи мубориза алайҳи бемории ВНМО/БПНМ ташкил шуда, дар ҷараёни он ба сокинону ҷавонони ноҳия маводҳои тарғиботӣ оид ба пешгирии ин вирус тақсим гашт.

Қаландар Давлатмамадов, мудири бахш зимни суханронии хеш қайд кард, ки баҳри пешгирии чунин беморӣ қабл аз ҳама ҷавонон бояд ҷонибдори ҳаёти солим бошанду дар солимгардонии ҷомеа ҳаматарафа нақши босазо гузоранд.

Инчунин байни ҳозирин мусобиқаҳои варзишӣ аз рӯи намуди варзиши сабук (дастхобонӣ, вазнбардорӣ ва ғайра) ва бозиҳои интеллектуалӣ доир шуда, ғолибон бо туҳфаю мукофотпулӣ қадрдонӣ шуданд.

Тарбиятгирандагони мактаб - интернати ҷумҳуриявии ноҳия бошанд баҳри болидахотирии иштирокдорон барномаи рангини фарҳангиро пешкаш намуданд.