Санъати мусиқии тоҷик таърихи қадима дошта, аз қадимулайём ба мо мерос мондааст. Имрӯз бархе аз ҷавонони соҳибистеъдод барои пос-дории жанрҳои гуногуни санъати ниёгонамон талошҳои зиёд менамоянд. Яке аз ҷавононе, ки дар самти ҳифз ва рушд бахшидани санъати мусиқии ниёгонамон пайи талош аст, Миҷгона Иброҳимова мебошад.

Миҷгона сарояндаи хушовоз, ромишгари чирадаст аст. Дар замири ин духтараки соҳибистеъдод маҳз муҳити оилавӣ донаи меҳру муҳаббатро нисбат ба ҳунари навозандагӣ ва сарояндагӣ кошта, нозукиҳои мутрибӣ ва сароидани сурудро дар жанри шашмақом аз он омӯхтааст. Бо ин гулдухтари олами санъат суҳбат намудем, ки фишурдааш пешкаш мегардад.

- Миҷгона, биёед суҳбатро аз чӣ гуна ба роҳи санъат ворид шуданатон, оғоз мекунем.

- Ман дар оилаи санъаткор ба дунё омадаам. Аз овони хурдсолӣ ҳар гоҳе падарам шогирдонашро даъват карда, дар хона тамрин менамуд, ман дар назди онҳо нишаста, тарзи сурудхониашонро бо диққат гӯш мекардам. Он вақт ҳамагӣ 5 сол доштам. Фориғ аз дунёи санъат ба онҳо пайравӣ менамудам. Аз ҳамон айём шавқи сурудхонӣ дар дилам ҷо шуд. Аз хурдсолӣ сурудҳои кӯдаконаро дар чорабиниҳои мактабӣ ва озмунҳои шаҳрию вилоятӣ мехондам. Шавқи зиёдамро нисбат ба санъат дида, падарам аз ҳамон вақт то ҳол маро дастгирӣ менамояд.

- Мо бештар навозиши асбоби танбурро дар иҷрои мардон медидем. Чӣ нозукӣ дорад ин асбоб ва чаро ба омӯхтани ин навъи асбоби мусиқӣ пардохтед?

- Дар ҳақиқат дуруст аст. Ман низ пеш аз оне ки навохтани ин сози мусиқиро шурӯъ намоям, онро бештар дар иҷрои мардон медидам. Вақте дидам, ки занон ин сози мусиқиро кам менавозанд, назди худ мақсад гузоштам, ки бо вуҷуди душвор будан, навохтани ин асбобро омӯхта, ба духтарони боистеъдод онро меомӯзонам.

- Ғайр аз танбур боз аз уҳдаи навохтани кадом сози мусиқӣ мебароед?

- Ғайр аз навохтани сози мусиқии танбур ба навохтани дутор низ машғулам. Инчунин баъзан асбоби мусиқии фортопианаро менавозам.

- Баъзе оилаҳо барои санъаткор шудани духтаронашон монеъ мешаванд. Ба санъат рӯ оварданатонро аҳли оила чӣ гуна пазируфтанд?

- Хушбахтам, ки имрӯз падару модарам маро дастгирӣ менамоянд. Чунки на ҳар волидайн духтарашро дар ин самт роҳнамоӣ мекунад. Аксари волидайн зид мешаванд, чунки санъат душвортарин касб барои духтарон мебошад. То хатм намудани мактаби миёна мехостам, ки ба риштаи тиб равона гардаму табиб шавам. Аммо меҳри беандоза нисбат ба санъат маро нагузошт, ки духтур шавам. Буданд нафароне, ки ба волидайнам мегуфтанд, духтаратонро ба соҳаи санъат роҳнамоӣ накунед. Дигар соҳаро пеша кунад, аммо падарам мегуфт, ки духтарам чӣ касберо интихоб намояд, ман иҷозат дода, дастгирӣ мекунам. Ва хушбахтам, ки бо маслиҳату кӯмакҳояшон маро мададгоранд.

- Шумо баробари навозиши танбур бо шашмақомсароӣ вориди саҳнаи ҳунар шудед. Дар жанри мусиқии классикии шашмақом сароидан, бароятон душвор нест?

- Яке аз жанрҳои душвортарин дар соҳаи санъат ин жанри мусиқии классикии шашмақом мебошад. Замони қадамҳои аввалини худро ба санъат гузоштам, аз омӯхтани жанри шашмақом шурӯъ кардам. Дар аввал албатта душвор буд бароям, вале бо вуҷуди ин зиёд тамрин менамудам. Пас аз тамрину кӯшишҳои зиёд навохтани сози мусиқии танбур ва сароидани жанри суннатии шашмақомро омӯхтам. То ҳол барои мукаммалтар омӯхтани ин жанр пайи талошам.

- Ғайр аз шашмақом боз дар кадом жанрҳо суруд месароед?

- Баробари сароидани сурудҳои классикии шашмақом, инчунин дар жанрҳои халқӣ ва эстрада сурудҳои ватандӯстона дар васфи меҳан, модар ва диёр месароям. Мехоҳам, ки дар чанд жанрҳои мусиқӣ ҳунару маҳорати худро санҷида, пайи ислоҳи хатоҳоям гардам.

- Дар ҷодаи санъат киро идеали худ меҳисобед?

- Ман сурудҳои сарояндагони бузурги санъати тоҷикро, ки ҳоло дар қайди ҳаёт нестанд, гӯш намуда, ба онҳо пайравӣ мекунам. Ба монанди устодони зиндаёд Барно Исҳоқова, Шоиста Муллоҷонова, Фазлиддин Шаҳобов ва дигар устодоне, ки суруду навозишҳои зиёдеро ба мо мерос гузоштаанд. Аз рӯйи сабки эшон бисёр сурудҳои халқӣ ва классикиро омода сохта, пешкаши тамошобинон менамоям.

- Дар яке аз мусоҳибаҳо гуфта будед, ки шояд дар жанри эстрада суруд сароед, аммо аз шашмақом даст намекашед ва мо шуморо дар эстрада ҳам дидем. Ҳоло ҳам ба ҳамин фикратон устуворед?

- Дар чорабиниҳои давлатӣ бештар дар жанри эстрада сурудҳои ватандӯстона месароям. Ин маънои онро надорад, ки ман аз шашмақом даст мекашам. Ҳарчанд дар дигар жанрҳо суруд сароида бошам ҳам, аммо жанри шашмақом бароям дар зинаи аввал меистад. Бештар кӯшиш мекунам, ки сурудҳои эстрадиро бо лаҳни шашмақом сароям.

- Айни ҳол дар куҷо кору фаъолият мекунед ва бо чӣ корҳо машғулед?

- Ҳоло хатмкунандаи Консерваторияи миллии Ҷумҳурии Тоҷикистон ба номи Талабхӯҷа Сатторов мебошам. Пас аз хатм мехоҳам, дар ин боргоҳи ҳунар фаъолияти кории худро ба роҳ монда, аз сози танбур ба донишҷӯён дарс диҳам.

- Дар оянда чӣ нақшаҳо доред ва санъати мусиқии тоҷикро чӣ гуна дидан мехоҳед?

- Оянда нақшаҳои зиёде дорам. Мехоҳам дар тамоми жанрҳои мусиқӣ ҳунару маҳорати худро санҷида, сайқал диҳам. Ҳамчун санъаткорони ҳирфаӣ ин жанри суннатиро рушду такомул додан мехоҳанд. Мо, ҷавонон бояд идомадиҳандаи кори бузургон бошему бо ҳунари асилу маҳорати фавқулодаи хеш нуфузи мусиқии ниёгонамонро дар арсаи байналмилалӣ баланд бардорем.

PS: Хонандагони азиз, шумо метавонед, шакли видеоии мусоҳибаро аз ютубканали рӯзномаи “Ҷавонони Тоҷикистон” - javonon tv тамошо кунед.