Имрӯз дар Маҷмааи “Кохи Афсарон”-и Вазорати мудофиаи кишвар ба ифтихори таҷлили сазовори Ҷашни 30-солагии Истиқлолияти давлатии Ҷумҳурии Тоҷикистон ҳамоиши ҷавонони – хизматчиёни ҳарбии Вазорати мудофиа зери унвони “Нақши ҷавонон дар 30-соли соҳибистиқлолӣ: дастовард ва дурнамо” баргузор гардид.

Дар ҳамоиши мазкур Абдусаттор Шоҳиён, муовини вазири мудофиа, Ризо Назарзода, муовини якуми раиси Кумитаи кор бо ҷавонон ва варзиш, собиқадорони соҳа, афсарон ва сарбозону курсантони Вазорати мудофиа иштирок доштанд.

Ҳамоишро Абдусаттор Шоҳиён оғоз намуда, қайд кард, ки дастовардҳои бузурги ҷавонони Вазорати мудофиа дар замони соҳибистиқлолӣ зиёд ба назар мерасад. Саҳми кормандони ҷавону афсарони Қувваҳои мусаллаҳи кишвар дар ҳифзи музаффариятҳо, истиқлолияти миллӣ, таъмини амнияту давлат, рушду такомули тамоми соҳаҳои ҷомеа ва зиндагии осоиштаи мардуми тоҷик басо муҳим арзёбӣ мегардад.

Сипас Ризо Назарзода аз рӯзҳои аввали соҳибистиқлолӣ ва лаҳзаҳои душвори охирҳои солҳои 90-уми асри гузашта ёдовар шуда, иброз дошт, ки ба қадри неъматҳои истиқлолият ва арзишҳои давлатӣ бояд расид. Ҳадаф аз баргузории ҳамоиши мазкур ёдовар шудан аз заҳматҳои шабонарӯзии Сарвари давлат мебошад, ки баҳри мустаҳкамии Қувваҳои мусаллаҳи кишвар равона шудааст.

Дар ҳамоиши мазкур аз ҷониби раиси шӯрои собиқадорони Вазорати мудофиа, полковники мустаъфӣ Ҳайдар Худойқулов дар мавзӯи “Саҳми собиқадорон дар пешрафт ва дастовардҳои Қувваҳои мусаллаҳи Ҷумҳурии Тоҷикистон дар даврони соҳибистиқлолӣ” маърӯза ироа гардид. Инчунин афсарону курсантони вазорат низ маърӯзаҳои худро дар мавзӯҳои “Эмомалӣ Раҳмон бунёдгари Артиши миллӣ”, “Саҳми бонувони низомӣ дар рушди Артиши миллӣ” ва ”Муҳофизони туем, эй Ватан” пешниҳод намуданд.

Дар идомаи ҳамоиш кормандону афсарон ва курсантони фаъоли вазорат бо ифтихорнома ва сипосномаҳои Кумитаи кор бо ҷавонон ва варзиш ва Иттифоқи ҷавонони Тоҷикистон сарфароз гардонида шуданд.

Дар охири чорабини аз ҷониби ансамбли “Шараф”-и Вазорати мудофиа барномаи фарҳангӣ – фароғатӣ пешниҳоди ҳозирин гардид.