Дастгириву ғамхории насли наврасу ҷавон яке аз самтҳои муҳими сиёсати давлатӣ ба шумор меравад. Ҳамин аст, ки барои дониш андӯхтану соҳибкасб гардидани қишри ояндадори ҷомеа кулли имкониятҳои мусоид фароҳам оварда шуда, баробари дигар соҳаҳо ба соҳаи ҷавонон низ таваҷҷуҳи махсус зоҳир мегардад.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба рушди малакаи зеҳнии ҷавонон ва нақши онҳо дар ҳаёти давлату миллат дар ҳар мулоқоти хеш ибрози назар менамоянд, ки ин асоси мантиқӣ дорад. Зеро ҷавононанд, ки дар оянда метавонанд, муҳофизи арзишу дастовардҳои миллат бошанду номи неки миллати тоҷикро дар арсаи байналмилалӣ боз ҳам баланд бардоранд.

Хурсандиовараш ин аст, ки роҳбарияти олии мамлакат дар муаррифии давлат дар сатҳи ҷаҳонӣ саҳми ҷавононро хеле баланд иброз медоранд. Аз ҷумла Пешвои миллат дар ин маврид зикр намудаанд: “Мо ифтихор мекунем, ки имрӯз ҷавонони мо дар дигаргунсозиҳои ҷомеаи навин фаъолона иштирок карда, дар муаррифии давлати тоҷикон ва баланд бардоштани парчами Тоҷикистон дар арсаи ҷаҳонӣ нақши шоиста доранд. Шумо, ҷавонони азиз, бояд хуб дарк намоед, ки ояндаи Тоҷикистони соҳибистиқлол дар дасти шумост. Ҷавонон дар ҳама давру замон неруи пешбарандаи ҷомеа ба ҳисоб мераванд. Бинобар ин, ҳамаи кишварҳои пешрафтаи сайёра барномаҳои миллии хешро бо такя ба ин неруи созанда тарҳрезӣ намуда, ҷавононро дар меҳвари сиёсати давлатии худ ҷой медиҳанд”.

Дар баробари дигар дастгириҳои наврасону ҷавонон яке аз роҳҳои ҳавасмандгардонӣ ва дастгирии иҷтимоии ҷавонон ин таъсиси Стипендияи президентӣ барои хонандагони мактабҳо ва донишҷӯён аст.

Стипендияи президентӣ бо мақсади фаъолгардонии насли ҷавони кишвар ва дастгирии шахсони болаёқат бо назардошти вазъи иқтисоди миллӣ тайёр намудани мутахассисон бо Фармони Президенти Ҷумҳурии Тоҷикистон аз 26-уми феврали соли 1998 таъсис ёфтааст. То соли 2005 стипендия барои 100 нафар ба андозаи панҷкаратаи маоши ҳадди ақал пешбинӣ шуда буд. Бо Фармони Президенти Ҷумҳурии Тоҷикистон аз 14 июли соли 2005 бошад, шумораи гирандагони Стипендияи президентӣ ба 300 адад расонида шуда, ахиран шуруъ аз соли 2018 ин шумора ба 400 адад расида буд.
Гарчанде аз зиёд намудани шумораи гирандагони Стипендияи президентӣ танҳо ду сол сипарӣ шуда бошад, аммо Президенти кишвар бо дарки муҳимияти рушди илму техника ва рушди фанҳои дақиқ 18 марти соли ҷорӣ дар вохӯрӣ бо зиёиёни кишвар аз афзун сохтани шумораи Стипендияи президентӣ мужда дода, иброз доштанд: “Пешниҳод менамоям, ки аз 1 январи соли 2021 шумораи гирандагони стипендияи Президенти Ҷумҳурии Тоҷикистон дар муассисаҳои таҳсилоти миёнаи умумӣ, ки дар омӯхтани фанҳои табиӣ ва риёзиву дақиқ натиҷаҳои баланд нишон медиҳанд, аз 400 нафар то 3000 нафар зиёд ва андозаи маблағи он 500 сомонӣ муқаррар карда шавад.

Инчунин, шумораи гирандагони чунин стипендияҳо дар муассисаҳои таҳсилоти олии касбӣ аз 100 нафар то 500 нафар ва барои аспирантони мактабҳои олӣ ва муассисаҳои илмӣ аз 15 нафар то 50 нафар зиёд карда шавад. Аз шумораи умумии Стипендияҳои президентӣ 70 фоиз барои фанҳои табиӣ, дақиқ ва риёзӣ равона карда шавад”.

Иқдоми навбатии Пешвои миллатро ҷомеа бо хушнудӣ истиқбол намуда, онро нишонаи олии таваҷҷуҳ ба насли ҷавон маънидод намуданд.

Мавлуда Давлатмамадова, номзади илмҳои техникӣ, ассистенти факултети химияи ДМТ, ки яке аз бонувони ихтироъкори муваффақи тоҷик аст, мегӯяд, зиёд шудани шумораи Стипендияи президентӣ, ки қисми бештараш ба фанҳои дақиқ равона карда мешавад, омили рушди фанҳои мазкур хоҳад гашт.

“Ин ҳама дастгириҳои Роҳбари давлат саривақтӣ аст. Бояд гуфт, ки ҷомеаи ҷаҳонӣ имрӯз бештар ба фанҳои дақиқ рӯ оварда истодааст. Зеро тараққиёти ҳамаи соҳаҳо, аз он ҷумла соҳаи истеҳсолот аз фанҳои табиӣ, дақиқ ва риёзӣ вобастагии калон дорад. Равона гаштани 70%-и Стипендияи президентӣ ба фанҳои табиӣ, дақиқ ва риёзӣ дар рушди фанҳои мазкур такони хубе хоҳад бахшид. Ҳамин гуна дастгириҳо боис мегарданд, то ҷавонону наврасон боз ҳам хубтару беҳтар илму дониш омӯзанду дар оянда ба навоварию ихтироъкорӣ машғул шаванд ва саҳми худро дар рушди кишвар гузоранд”, - афзуд Мавлуда Давлатмамадова.

“Зиёд гардидани Стипендияи президентӣ барои хонандагони болаёқат нишони қадрдониву ҳавасмандгардонии хонандагон аст. Ин бори аввал нест, ки шумораи гирандагони чунин стипендия аз ҷониби Президенти кишвар зиёд карда мешавад. Дар солҳои соҳибистиқлолӣ мо шоҳиди он гардида истодаем, ки соҳаи маориф рушд намуда, баробари ин ҳавасмандиҳои хонандагон бештар шуда истодааст. Имрӯз дар тамоми манотиқи кишвар муҳайё будани шароити созгори илму таҳсил худ шаҳодати дастгириву ғамхории Ҳукумату давлат мебошад.

Хонандагони мо имрӯз бояд аз тамоми шароитҳои мусоиди илмомӯзӣ, ки бо заҳмату талошҳо дар тӯли соҳибистиқлолӣ фароҳам оварда шуданд, самараноку мақсаднок истифода намоянду дониш аз бар намоянд ва дар оянда бо донишу маҳорати хеш рушдбахшанда ва муаррификунандаи кишвар дар сатҳи ҷаҳон бошанд”, - иброз дошт омӯзгор Баракатуллои Мирзоқаюм.

Хулоса, афзун гардидани шумораи гирандагони Стипендияи президентӣ давоми мантиқии сиёсати Ҳукумату давлат дар самти илмомӯзии наврасону ҷавонон буда, дар ин росто танҳо лозим аст, ки наврасону ҷавонон бояд талош намоянд, то фарди соҳибилму соҳибкасб ва рушдбахшандаи кишвари хеш бошанд.