ҶАВОНОН
Якшанбе 20 Сентябр 2020 07:21
7236
Паёми табрикии Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи байналмилалии ҷавонон

Ҷавонони хушиқбол ва саодатманди кишвар!

Дар ибтидо ҳамаи шуморо бахшида ба Рӯзи байналмилалии ҷавонон, ки ҳамасола дар таърихи 12 август дар саросари олам ҷашн гирифта мешавад, самимона таҳният гуфта, дар фаъолияти рӯзмараатон барору комёбӣ хоҳонам.

Ҷавонон дар ҳама давру замон неруи асосии пешрафти дилхоҳ давлату миллат ба ҳисоб рафта, аз ҷониби кишварҳои олам ба ин қишри ҷомеа ҳамеша таваҷҷуҳи махсус равона карда мешавад. Ҳамин аст, ки бо назардошти саҳми неруи ояндадори ҷомеа аз ҷониби созмонҳои байналмилалӣ дар саросари олам махсус рӯзеро ба номи ҷавонон эълон карданд ва хушбахтона онро ҳар сол дар сатҳи баланд қайд менамоянд.
Ҷавонони Тоҷикистон хушнуд аз онанд, ки ин санаи фархунда дар кишвари мо низ таҷлил шуда, аз нақши ин қишри ҷомеа дар пешрафти соҳаҳои гуногуни хоҷагии халқи мамлакат ёдовар мешаванд ва ояндаи кишварро дар онҳо мебинанд.

Эътироф шудани ҷавонон ҳамчун ояндасозони миллат, неруи пешбаранда ва қувваи ҳаракатдиҳандаи ҷомеа, таваҷчуҳи бештар зоҳир намудани давлат ва Ҳукумати Ҷумҳурии Тоҷикистон ба ин қишри ҷомеа, аз он шаҳодат медиҳад, ки воқеан ҷавонони даврони соҳибистиқлол идомабахши ҳадафҳои олии кишвар ҳастанд. Имрӯз Ҳукумати кишвар барои ташаккули ҷаҳонбиниву баланд бардоштани сатҳи дониши ҷавонон ҳавасманд буда, ба таҳсили ҷавонон ҳамҷониба мусоидат менамояд.

Ҳукумати кишвар аз рӯзҳои нахустини соҳибистиқлолӣ ба ҷавонон таваҷҷуҳи хосса зоҳир намуда, барои соҳибкасбу соҳибилм гардидани онҳо кулли шароитҳои мусоидро фароҳам овардаанд. Барои ҳавасмандии ҷавонон тадбирҳое зиёде роҳандозӣ шудаанд, ки намунаи онҳо ин Квотаи президентӣ, Стипендияи президентӣ ва дигар дастгириҳо мебошанд. Ҳамзамон барои ёдовар шудан аз нақши ҷавонон дар пешрафти давлати тозабунёди Тоҷикистон бо ибтикори роҳбарияти олии кишвар ҳар сол “Рӯзи ҷавонон” қайд мегардад, ки ин намунаи олии таваҷҷуҳу ғамхории Ҳукумати кишвар ба ҳисоб меравад.

Ҳукумати кишвар аз мову шумо – насли ояндасози кишвар умеди калон дорад. Ман бовар дорам, ки шумо - ҷавонони кишвар аз уҳдаи иҷрои ҳама вазифаҳои дар наздатон гузошташуда сарбаландона мебароед ва минбаъд низ мекӯшед, ки ба нафъи давлату ҷомеа боз ҳам содиқона хизмат намоед. Зеро шумо - ҷавонон мояи ифтихор ва сарбаландии миллат маҳсуб меёбед. Маҳз шумо қудрат доред, чун пешбарандаи илму фарҳанги миллати хеш ва посдорони мероси аҷдодӣ ба наслҳои оянда хизмати арзанда намоед. Шумо борҳо собит намудаед, ки дар ҳақиқат пайравони асили Пешвои муаззами миллат ҳастед ва инро минбаъд низ дар иҷрои ҳама кору масъулият, новобаста аз душвориҳои шароити ҷаҳонишавӣ ва таъсири дигар омилҳои беруна собит кардан лозим аст.

Аз ин лиҳоз, имрӯз ҳар яки шумо – ҷавонони хушиқболи Ватанро зарур аст, ки ҷавобан ба ғамхориву дастгириҳои давлату ҳукумат бо илму дониши қавӣ, ақлу заковати зеҳнӣ, истеъдоду малакаи фитрӣ, қобилияту ташаббусҳои наҷиб, иқдомҳои бунёдкоронаву ақидаҳои ҷолиби созанда, касбу ҳунари воло ва бо дарки баланди масъулияти инсонӣ ва ватандӯстиву хештаншиносӣ дар рушду инкишоф ва ободиву шукуфоии ин сарзамини биҳиштосо саҳми арзандаи хешро гузоред.

Мо ҳама боварии комил дорем, ки шумо, насли ҷавон таҳти роҳбарии хирадмандонаи фарзанди фарзонаи миллат, Пешвои муаззами миллати тоҷик, пуштибон ва ҳимоятгари ҷавонон, Президенти Ҷумҳурии Тоҷикистон, муҳтарам Эмомалӣ Раҳмон дар ободӣ ва шукуфоии Ватани азизамон саҳми арзандаи хешро гузошта, хизматҳои шоиста хоҳед кард. Зеро ҷавонон пайравони воқеии Пешвои миллат ва муҳофизони дастовардҳои 29 соли Истиқлолияти давлатӣ мебошанд.

Дар охир бори дигар кулли ҷавонони саодатманди Тоҷикистонро ба ифтихори Рӯзи байналмилалии ҷавонон самимона табрик гуфта, ба ҳар яки шумо саломатӣ, иқболи нек ва дар роҳи хизмат ба халқу Ватан ғайрату матонат ва азму иродаи қавӣ орзу менамоям.

Рӯзи байналмилалии ҷавонон муборак!

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.