Баробари дигар дастгириҳои ҷавонон аз тарафи давлату Ҳукумат Квотаи президентӣ яке аз ҳавасмандиҳои асосӣ ба ҳисоб меравад. Тибқи иттилои Вазорати маориф ва илми кишвар имсол тариқи Квотаи президентӣ 600 нафар ҷавон ба макотиби олии кишвар дохил шуда, касбҳои гуногунро соҳиб мешаванд.

Яке аз нафароне, ки тариқи Квотаи президентӣ имсол донишҷӯ мегардад, Ҷонона Маҳмадзода, хонандаи Муассисаи таҳсилоти миёнаи умумии №3-и ноҳияи Рӯдакӣ мебошад. Ӯ дар озмуни дарёфти Квотаи президентӣ иштироки фаъолона намуда, бо муваффақият ба факултети забони англисии Донишгоҳи давлатии омӯзгории Тоҷикистон ба номи С. Айнӣ дохил шудааст. Ҷонона аз он шод аст, ки имрӯз тариқи квотаи мазкур ба донишгоҳи орзуҳояш дохил гардидаву соҳиби пешаи мавриди назараш мегардад.

Ҷонона дар мактаби миёна баробари омӯзиши дигар фанҳо ба забони англисӣ таваҷҷуҳи бештар зоҳир намудаву аз ин фан дар чандин озмунҳо иштироку сазовори ҷойҳои ифтихорӣ гардидааст. Аз ҷумла, дар озмуни “Thе best pupil” бо иштироки фаъолонаи худ 5 диплом ва ифтихорнома ба даст овардааст.

Чун дар оянда омӯзгор шуданист, доир ба ин пешаи пурифтихор андешаҳои самимӣ дораду мегӯяд, нақши омӯзгор дар таълиму тарбия ва соҳибкасб шудани насли наврас басо бузург аст. Ӯ гуфт: “Аз хурдӣ орзу дорам, ки омӯзгор шавам ва хушҳолам, ки имрӯз барои расидан ба он хеле наздик гардидам ва баъди таҳсил дар донишгоҳ номи баланди омӯзгориро соҳиб мешавам. Омӯзгор нафарест, ки аҳли башарро ба роҳи ростӣ ва илму дониш раҳнамун месозад. Доир ба нақши омӯзгор Президенти кишвар низ борҳо таъкид намудаву иброз доштаанд, ки тақдири насли ояндасоз ва пешбарандаи давлату ҷомеа дар дасти омӯзгор аст”.

Ӯ мегӯяд, мо-ҷавонон хушбахт аз онем, ки дар чунин як давлати орому осуда умр ба сар мебарему чунин сарвари мушфиқу ғамхор дорем, ки баҳри мо фарзандонаш ҳемаша ғамхорӣ менамояд, то дар тамоми саҳаҳои фаъолият ҷойгоҳи хешро дошта бошем.

- Шахсе, ки мақсад дорад, нигоҳ накарда ба мушкилиҳо баҳри амалӣ гардидани он талош мекунад. Муҳим мақсади муайян доштан аст. Имрӯз барои он ки мо-ҷавонон соҳиби касбу ҳунар шавем, кулли шароитҳо муҳайёст. Тамоми имкониятҳо аз тарафи Ҳукумати ҷумҳурӣ фароҳам оварда шудаанд. Танҳо ба таври ҷиддӣ пайи донишомӯзӣ шудан даркор асту халос, - гуфт, Ҷонона.

Дар оянда нақша дорад, ки баъд аз хатми донишгоҳ ҳамчун омӯзгори фанни забони англисӣ дарс гӯяд ва дар омӯзишу аз бар кардани забони хориҷиву саводнок гардидани толибилмон саҳми худро гузорад.

Зулфия САФАРОВА,
коромӯзи “ҶТ”