Дар шаҳри Хуҷанд Фестивал - озмуни байналмилалӣ таҳти унвони “Ушшоқи Раҳмонӣ”, ки 10-12 май доир гардида буд, ҷамъбаст гардида, ғолибон қадрдонӣ гардиданд.

Дар муассисаи давлатии Маҷмааи таърихию фарҳангии “Қалъаи Хуҷанд” бахшида ба Рӯзи шашмақом ва маросими ҷамъбастии Фестивал - озмуни байналмилалӣ таҳти унвони “Ушшоқи Раҳмонӣ” чорабинии бошукуҳи фарҳангӣ баргузор гардид.

Дар чорабинӣ раиси вилояти Суғд Раҷаб Аҳмадзода, вазири фарҳанги Ҷумҳурии Тоҷикистон Матлубахон Сатториён, аҳли фарҳангу ҳунар, меросбарони асили мусиқии шашмақом, иштирокчиёни Фестивал ва дилбохтагони ҳунари волои шашмақом иштирок намуданд.

Мавриди зикр аст, ки дар партави сиёсати фарҳангпарваронаи Пешвои миллат муҳтарам Эмомалӣ Раҳмон ва бо ташаббуси Мақомоти иҷроияи ҳокимияти давлатии вилояти Суғд дар шаҳри Хуҷанд бори аввал Фестивал - озмуни байналмилалӣ таҳти унвони “Ушшоқи Раҳмонӣ” баргузор гардид.

Фестивал-озмуни мазкур ба ифтихори 35-солагии Истиқлоли давлатии Ҷумҳурии Тоҷикистон роҳандозӣ гардида, дар он ҳунармандони ансамблҳои шашмақомхонон, мутахассисони соҳаи фарҳанг ва санъат, мусиқашиносони варзидаи ватанӣ ва хориҷӣ, аз ҷумла аз кишварҳои Фаронса, Озарбойҷон, Ҷумҳурии Исломии Эрон, ҷумҳуриҳои Тоҷикистон, Узбекистон ва Қирғизистон иштирок намуданд.

Гуфта шуд, ки дар замони соҳибистиқлолӣ бо таваҷҷуҳ ва ғамхории пайвастаи Пешвои миллат муҳтарам Эмомалӣ Раҳмон фарҳанг ҳамчун ҳастии миллат шинохта шуда, барои рушди он тадбирҳои муҳим амалӣ гардид. Эълон гардидани 12 май ҳамчун Рӯзи шашмақом дар Тоҷикистон нишонаи возеҳи таваҷҷуҳи Ҳукумати мамлакат ба ин ганҷинаи бебаҳо ва ҳифзу гиромӣ доштани он арзёбӣ мешавад.

Дар маросими ҷамъбастии Фестивал ғолибон муайян ва қадрдонӣ гардиданд. Намояндаи ансамбли “Мугам” аз Ҷумҳурии Озарбойҷон ва Навбаҳор Шарифова аз Ҷумҳурии Тоҷикистон сазовори ҷойи сеюм гардида, бо диплом ва мукофотпулӣ дар ҳаҷми 2 ҳазор доллар сарфароз гардонида шуданд.

Мақоми дуюмро ансамбили шашмақомхонони Театри мусиқии мақоми шаҳри Марғелони вилояти Фарғонаи Ҷумҳурии Узбекистон ва Сардорбек Солиев аз Ҷумҳурии Тоҷикистон ба даст оварда, бо диплом ва мукофотпулӣ дар ҳаҷми 3 ҳазору 500 доллар сарфароз гардонида шуданд.

Ҷойи якум ба ансамбли шашмақомхонони Филармонияи давлатии Тоҷикистон ба номи Акашариф Ҷӯраев ва ансамбли шашмақомхонони Маркази мақоми шаҳри Бухорои Ҷумҳурии Узбекистон муносиб дониста шуда, ба онҳо димлому мукофотпулӣ дар ҳаҷми 5 ҳазор доллар супорида шуд. Шоҳҷоизаи Фестивал - озмуни байналмилалӣ таҳти унвони “Ушшоқи Раҳмонӣ” ба ансамбли шашмақомхонони “Нури Хуҷанд” бо мукофотпулии 7 ҳазор доллар супорида шуд.

Ҳамзамон, мутахасисони соҳаи шашмақом, иштироркчиёни фаъоли Фестивал, меҳмонону меросбарони асили санъати шашмақом бо ҷоизаи махсуси раиси вилояти Суғд аз 500 то 1000 доллар сарфароз гардонида шуданд.

Субҳиддин ҚОДИРОВ, “ҶТ”