Дар ин бора имрӯз – 20 июл Абдураҳмонзода Абдураҳмон, вазири рушди иқтисод ва савдои Ҷумҳурии Тоҷикистон зимни нишасти хабарӣ иттилоъ дод.

Ба гуфтаи ӯ новобаста аз таъсир ва пайомадҳои манфии равандҳои ҷаҳонию минтақавӣ, дар нимсолаи якуми соли 2026 рушди мусбати иқтисоди миллӣ таъмин гардида, суръати рушди воқеии маҷмуи маҳсулоти дохилӣ (ММД) ба 8,2 фоиз расида, ҳаҷми он 81,7 миллиард сомониро ташкил дод. Ин нишондиҳанда нисбат ба ҳамин давраи соли гузашта 10,8 миллиард сомонӣ зиёд мебошад.

Дар ин давра рушди иқтисоди миллӣ асосан аз ҳисоби афзоиши ҳаҷми истеҳсоли маҳсулоти саноатӣ 14,1 фоиз, кишоварзӣ 7,2 фоиз, хизматрасонии пулакӣ 10,6 фоиз, маблағгузорӣ ба сармояи асосӣ 18,4 фоиз, гардиши савдо 26,1 фоиз, боркашонӣ 14,7 фоиз ва мусофиркашонӣ 8 фоиз таъмин шудааст.

Ҳамчунин, дар доираи татбиқи ҳадафи чоруми миллӣ - саноатикунонии босуръати кишвар, зиёд намудани ҳаҷми истеҳсоли маҳсулот, таъмини бозор бо маҳсулоти рақобатпазири ватанӣ ва таъсиси ҷойҳои нави корӣ, дар давраи ҳисоботӣ 191 корхонаи нави саноатӣ бо таъсиси 1160 ҷойи нави корӣ ба истифода дода шуд.

Аз ин шумора, 65 корхона дар вилояти Суғд, 46 корхона дар вилояти Хатлон, 28 корхона дар Вилояти Мухтори Кӯҳистони Бадахшон, 22 корхона дар шаҳри Душанбе ва 30 корхона дар шаҳру ноҳияҳои тобеи ҷумҳурӣ фаъолиятро оғоз намуданд.

Дар идома қайд гардид, ки ҳаҷми умумии гардиши савдои дохилӣ ба 43 миллиарду 562,2 миллион сомонӣ расида, нисбат ба ҳамин давраи соли гузашта 26,1 фоиз афзоиш ёфтааст.

Гулафшон КАРИМОВА, “ҶТ”